मङ्सिर ४ गते सम्पन्न भएको प्रतिनिधिसभा निर्वाचनका उम्मेदवार अरुण पौडेलको जहाज दुर्घटनामा परि निधन भएको छ । चुनावमा पर्वतबाट स्वतन्त्र उम्मेदवार बनेका पौडेल कोरियाबाट फर्किएपछि समाज सेवामा लागेका थिए । कुश्मा नगरपालिका–९ कटुवाचौपारी निवासी ४६ वर्षीय अरुण पौडेल र उनकी छोरी ११ वर्षीया प्रसिद्धि पौडेलसंगै दुर्घटनामा ज्यान गुमाएका हुन ।
पोखरामा आइतबार बिहान भएको यती एयरलाइन्सको विमान दुर्घटनामा परी पर्वतका मात्रै नौ जनाको ज्यान गएको पुष्टि भएको छ । जसमा पाँच जनाको सनाखत भएको छ । ज्यान गुमाउनेमा पर्वतको कुश्मा नगरपालिका–१४ आर्थर डाँडाखर्कका पत्रकार त्रिभुवन पौडेल, कुश्मा नगरपालिका–१ पाङका १० महिने बालक रिहान पौडेल र रचना काफ्लेको सनाखत भएको छ भने पर्वतको विहादी गाउँपालिकाका चारजनाको सनाखत हुन सकेको छैन । उनीहरुको नामावलीसमेत पहिचान हुन सकेको छैन ।
काठमाडौँको वृहस्पति विद्याश्रममा कक्षा ५ मा पढ्ने छोरी प्रसिद्धि जन्मघर पर्वत आउने क्रममा उनीहरु दुर्घटनामा परेको जनाइएको छ । “छोरीको स्कुल बिदा पनि भएकाले दाजुभाइ भेटौँ भनेर जन्मघर आउन लाग्नुभएको रहेछ”, अरुणका छिमेकी उपेन्द्र अधिकारीले भने, “उहाँहरूलाई लिन भाइ अरुणका भाइ केशव विमानस्थलमै पुग्नुभएको थियो ।” केशवले नै पोखरा स्वास्थ्य विज्ञान प्रतिष्ठानमा गएर अरुण र प्रसिद्धिको शवको पहिचान गरे ।
मृतक पौडेल ९ वर्ष कोरियामा बसेर फर्किएका थिए । अधिकारीका अनुसार कोरियाबाट फर्केपछि पौडेल तीन छोरी र श्रीमतीसँग काठमाडौँमा बस्दै आएका थिए।
त्यसैगरी विजय गुरुङ मोदी गाँपालिका १०, जमुना शर्मा, युवराज शर्मा, आयुर्दी शर्मा र वेबी शर्मा विहादी गाँउपालिका ५ को दुर्घटनामा परि ज्यान गएको हो ।
प्रतिक्रिया