लुम्बिनी प्रदेशको सभामुखमा माओवादीका घर्ती निश्चित, उपसभामुखमा ३ जनाको प्रतिस्पर्धा

लुम्बिनी प्रदेशसभाको सभामुखमा नेकपा माओवादी केन्द्रका तुलाराम घर्तीको मात्रै उम्मेदवारी परेको छ । उपसभामुखमा भने नेपाली कांग्रेस, राप्रपा र नागरिक उन्मुक्ति पार्टीले समेत उम्मेदवारी मनोनयन दर्ता गराएका छन् ।

नेपाली कांग्रेसबाट नवलपरासी निर्वाचन क्षेत्र नम्बर १ क बाट निर्वाचित विश्वप्रेम पाठक, राप्रपाकी मेनुका खाँण केसी र नागरिक उन्मुक्ति पार्टीकी निर्मलादेबी चौधरीको मनोनयन दर्ता भएको प्रदेश सभा सचिवालयले जारी गरेको सूचनामा भनिएको छ ।

कांग्रेसका पाठकको प्रतावकमा प्रदेश सभा सदस्य बसिउद्दिन खाँ र समर्थकमा राजु खनाल छन् भने उपसभामुखमा नागरिक उन्मुक्ति पार्टीबाट रुपन्देही जिल्ला निवासी निर्मलादेवी चौधरीको प्रस्तावकमा प्रदेश सभा सदस्य नरमाया ढकाल र समर्थकमा संसदीय दलका नेता धर्म चौधरी छन् ।

दलका नेता चौधरीले केन्द्रमा राष्ट्रपति, सभामुख र उपसभामुखमा कुनै सहमति नभएकले प्रदेशमा उम्मेदवारी दिएको बताए । उनले सत्ता गठबंधनबाट नागरिक उन्मुक्ति नबाहिरिएको तर दुई वटा मन्त्रालय दिने सहमति पालनामा एमाले र माओवादी इमानदार नदेखिएको गुनासो गरे । सभामुख र उपसभामुख चयनका लागि भोलि दिउँसो निर्वाचन हुँदैछ ।