एमालेको भागमा परेका आठ मन्त्री र मन्त्रालय

सत्ता गठबन्धनको सोमबार राती भएको सहमतिअनुसार नेकपा एमालेको भागमा ८ मन्त्रालय परेको छ। उच्चस्तरीय राजनीतिक संयन्त्रको बैठकले गठबन्धन दलको ठुलो दल नेकपा एमालेले ८ वटा मन्त्रालयसहित सरकारमा १० जनाको सहभागिता गराउने भएको हो।

प्रधानमन्त्री निवास बालुवाटारमा सोमबार राति बसेको ५ घण्टा लामो बैठकले २ राज्यमन्त्रीसहित ८ मन्त्री एमालेले पाउने सहमति भएको हो।

नयाँ मन्त्री को को ?

जसमध्ये उपप्रधानमन्त्री र अर्थमन्त्री विष्णु पौडेलसहित ३ जना मन्त्री यसअघि नै नियुक्त भइसकेका छन्। बाँकी रहेका चार विभागीय मन्त्री तथा २ राज्यमन्त्री मंगलबार नियुक्त हुनेछन्। बाँकी विभागीय मन्त्रीमा पर्वतका सांसद पदम गिरी, सुनसरीकी सांसद भगवती चौधरी, सर्लाहीका सांसद हरि उप्रेती र कपिलवस्तुका सांसद बलराम अधिकारीले पाउने एमाले स्रोतले जनाएको छ ।

दोस्रो पटक चुनाव जितेका र अहिलेसम्म मन्त्री बन्न नपाएका सांसदलाई यस पटक एमालेले प्राथमिकता दिएको बताइएको छ। त्यसैगरी एमालेको भागमा परेको २ राज्यमन्त्रीमध्ये एक रौतहटका सांसद किरण साह हुने भएका छन्। अर्को राज्यमन्त्री पर्साका सांसद राजकुमार गुप्ता वा अर्को कसलाई पठाउने भन्ने तय भइनसेको एक नेताले बताए। एमालेको तर्फबाट यसअघि ज्वालाकुमारी साह, राजेन्द्र राई र दामोदर भण्डारी मन्त्री नियुक्त भइसकेका छन्।

एमालेले परराष्ट्र मन्त्रालय, स्वास्थ्य तथा जनसंख्या मन्त्रालय, रक्षा मन्त्रालय, कृषि तथा पशुपंक्षी मन्त्रालय, भूमि व्यवस्था, सहकारी तथा गरिबी निवारण मन्त्रालय, उद्योग, वाणिज्य तथा आपूर्ति मन्त्रालय र महिला, बालबालिका तथा जेष्ठ नागरिक मन्त्रालय पाउने सम्भावना छ। यद्यपि मन्त्रालयको भागबन्डा मंगलवार बिहानसम्म तलमाथि हुन सक्ने छ। अझै दलहरुबीच अन्तिम टुगो भने लाग्न बाँकी छ । केही दलहरु सरकारमा सहभागी हुने बारेमा छलफल जारी नै रहेकाले केही परिवर्तन समेत हुन सक्ने छ ।