विमान दुर्घटनाका २ जनालाई गोताखोर र ड्रोन मार्फत खोजी

आइतबार विहान कास्कीको पोखरामाा भएको यती एयरलाइन्सको विमान दुर्घटनामा बेपत्ता भएकामध्ये २ जना अझै फेला परेका छैनन ।

दुर्घटनालगत्तै परिचालन भएको नेपाली सेना, सशस्त्र प्रहरी र नेपाल प्रहरीको टोलीले निरन्तर प्रयास गर्दापनि २ वटा शव अर्झ भेट्न नसकिएको कास्कीका प्रमुख जिल्ला अधिकारी टेक बहादुर केसीले जानकारी दिएका छन् ।

आज बिहानैदेखि खोजी कार्य सुरु भएको छ । सोचेजस्तो सजिलो नभएको भन्दै केसीले गोताखोरदेखि ड्रोनसम्म प्रयोग गरेर खोजीकार्य अघि बढाएको बताए ।
सोमबार समेत ड्रोन प्रयोग गरी २ जनाको शव पत्ता लगेको थियो।

दुर्घटनाको पहिलो दिन ६३ र दोस्रो दिन सोमबार ७ वटा शव फेला पारिएको केसीले बताएका छन् ।

त्यस्तै, दुर्घटनामा निधन भएका चालक दलका सदस्य क्रु मेम्बर, विदेशी नागरिक र पहिचान हुन नसकेका र काठमाडौंमा आफन्त भएकाहरुको शव आज काठमाडौं ल्याइँदैछ।

पहिचान भएका र आफन्त उपस्थित भएकाहरुको भने पोखराबाटै शव हस्तान्तरण गरिँदैछ।
मेडिकलको टिमले काम सक्नेबित्तिकै आजै काठमाडौं पठाउने तयारी छ । यती एअरलाइन्सको विमान पुरानो पोखरा विमानस्थल पछाडिको सेती खोंचमा दुर्घटनामा परेको थियो।

विमानमा ४ चालक दल र ६८ यात्रुसहित ७२ जना सवार थिए। विमानमा पर्वत जिल्लाका मात्रै १० जनाले ज्यान गुमाएका छन् ।