मधेश प्रदेशका मुख्यमन्त्री यादवले नयाँ इतिहास रचे

मधेस प्रदेशको मुख्यमन्त्री सरोज कुमार यादवले विश्वासको मत पाउनु भएको छ । मुख्यमन्त्री यादवलाई १०२ सांसदले विश्वासको मत दिएका हुन् ।

प्रदेशसभाका सभामुख रामचन्द्र मण्डलले आजको बैठकमा १०२ उपस्थित भएको र प्रस्तावको पक्षमा सबै १०२ मत खसेको जानकारी दिनुभयो । उहाँले मुख्यमन्त्री यादवले विश्वासको मत प्राप्त गरेको घोषणा पनि गर्नुभयो ।

गत पुस २७ गते जसपा संसदीय दलको नेता यादवले सत्ता साझेदार दलहरु र स्वतन्त्र साँसद गरी ६३ साँसदको समर्थनमा मुख्यमन्त्री नियुक्त हुनुभएको थियो । पुस २९ गते पद तथा गोपनीयताको शपथ लिनुभएका यादव आज बिपक्षमा एक मत नपरी आज विश्वासको मत पाउनु भएको हो ।

मुख्यमन्त्री बन्ने बेलामा यादवलाई नेपाली काँग्रेस, लोसपा र नेकपा एसले समर्थन गरेको थिएन । तर आज काँग्रेस, लोसपा, नेकपा एस, सत्ता साझेदार सबै दल र तीन स्वतन्त्र साँसदले पनि उहाँलाई विश्वासको मत दिएका छन।