सन्दिप लामिछानेको मुद्दामा पुनरावेदन गर्ने सरकारी वकिलको सुुझाव

क्रिकेटर सन्दिप लामिछानेलाई थुनामा राख्नुपर्ने भनी बहस गरेका सरकारी वकिलहरुले उनलाई धरौटीमा छाड्ने उच्च अदालत पाटनको आदेश विरुद्ध सर्वोच्च जानुपर्ने राय तयार गरेका छन् ।

उच्च सरकारी वकिलको कार्यालय, पाटनले उच्च अदालतको आदेश बदरको माग राखी सर्वोच्च अदालतमा निवेदन दिनुपर्ने राय तयार भएको हो । राय सहितको प्रतिवेदन महान्यायाधिवक्ता कार्यालयमा पुगेको छ ।

उच्च अदालतको आदेश विरुद्ध सर्वोच्च अदालतमा जाने कि नजाने भन्नेवारे महान्यायाधीवक्ता कार्यालयले निर्णय गर्छ । आदेश बदरको माग राखी सर्वोच्च अदालत जानुपर्ने भनी आएको रायमाथि अध्ययन हुने र त्यसका आधारमा निर्णय हुने महान्यायाधिवक्ता कार्यालयले जनाएको छ ।

उच्च सरकारी वकिलको कार्यालय पाटनले बलात्कारजस्तो जघन्य अपराधमा आरोपितविरुद्ध तत्काल प्राप्त प्रमाणले उनी दोषी हुनसक्ने अवस्था देखिएको अवस्थामा धरौटीमा छाड्ने आदेश त्रुटिपूर्ण रहेको भनी राय तयार पारेको छ ।

पिडितले अदालतमा बकपत्र गर्दा समेत जाहेरीसँग मिल्नेगरी बकपत्र गरेकाले पनि उनको सुरक्षाका लागि आरोपितलाई थुनामा राख्ने आदेश हुनुपर्ने भन्दै राय तयार गरिएको हो । महान्यायाधीवक्ता कार्यालयले सर्वोच्च जाने निर्णय गरेपछि मात्रै उच्चको आदेश विरुद्ध सर्वोच्च अदालतमा निवेदन दर्ता हुन्छ ।