बागमती प्रदेश सरकारमा बुधबार एकैदिन ८ मन्त्री नियुक्त भई पद तथा गोपनीयताको शपथ सम्पन्न भएको छ । सत्तारुढ गठबन्धनका ३ दलबाट बुधबार ८ जना मन्त्री बनेका हुन् ।
नेकपा माओवादी केन्द्र नेतृत्वको प्रदेश सरकारमा सो दलबाट ३, नेकपा एमालेबाट ३ र राप्रपाबाट २ जना मन्त्री नियुक्त भएका हुन् ।
माओवादी केन्द्र बागमती प्रदेश संसदीय दलका नेता सालिकराम जम्कट्टेल नेतृत्वको सरकारमा यससँगै सो दलका मन्त्रीको संख्या ४ पुगेको छ भने एमालेका पनि ४ जना पुगेको छ । यस्तै राप्रपाका ३ जना मन्त्री बनेका छन् । यससँगै बागमती प्रदेश सरकारले पूर्णता पाएको छ ।
गत पुस २५ गते प्रदेशको मुख्यमन्त्री नियुक्त भएका जम्कट्टेलले २६ गते शपथ ग्रहण गर्दै प्रदेशमा कायम रहेको १४ मन्त्रालयको संख्या घटाउने निर्णय गरेका थिए । सोही अनुसार प्रदेशका प्रमुख सचिव मुकुन्द्र निरौलाको संयोजकत्वमा मन्त्रालय घटाउन अध्ययनकार्यदल गठन गरेका भएको थियो । उक्त कार्यदलको सुझाव अनुसार मुख्यमन्त्री जम्कट्टेलले मंगलबार कुल सांसदको १० प्रतिशत हुने गरी प्रदेशमा ११ मन्त्रालय कायम गर्ने निर्णय गरेका थिए । ११ मन्त्रालय कायम गरेको भोलिपल्ट नै मुख्यमन्त्री जम्कट्टेलले मन्त्रिपरिषदलाई पूर्णता दिएका हुन् ।
प्रदेशको आन्तरिक मामिला तथा कानुन मन्त्रीमा गंगा नारायण श्रेष्ठ, भौतिक पूर्वाधार विकासमन्त्रीमा युवराज दुलाल ‘शरद’, सामाजिक विकास मन्त्रीमा कुमारी मोक्तान, कृषि तथा पशुपन्छी विकास मन्त्रीमा केशवप्रसाद पोखरेल नियुक्त भएका छन् । यसैगरी श्रम रोजगार तथा यातायात मन्त्रीमा एकालाल श्रेष्ठ, स्वास्थ्य मन्त्रीमा रामेश्वर श्रेष्ठ, खानेपानी, ऊर्जा तथा सिँचाइ मन्त्री उद्धव थापा तथा पर्यटन, उद्योग तथा सहकारी मन्त्रीमा डम्बर बहादुर तामाङ र वन तथा वातावरण मन्त्रीमा राजु विष्टले जिम्मेवारी पाएका छन् । यसअघि प्रदेशको मुख्यमन्त्रीमा जम्कट्टेल र आर्थिक मामिला तथा योजनामन्त्री जगन्नाथ थपलियाले जिम्मेवारी पाइसकेका छन् ।
प्रतिक्रिया