फलेवासको २३ किलोमिटर सडक कालोपत्रेको चरणमा

फलेवास नगरपालिकाभित्र पर्ने बिभिन्न वडा कार्यालयको मुकाम जोड्ने सडकहरु कालोपत्रे हुने भएका छन् । नगरप्रमुख गंगाधर तिवारीको लामो समयको दबाब र निरन्तरको प्रयासपछि फलेवास नगरभित्रका वडा नम्बर ६, ७, ८, ९ र २ नम्बर वडा जोड्ने सडक कालोपत्रे हुने भएको हो । फलेवासका वडा नम्बर ६ देविस्थानको ओख्ले हुँदै लमाय–लिमिठाना, ठानामौला, बेतेनी थापाठाना सडक कालोपत्रेको प्रकृयामा अघि बढेको हो ।

नगरका पाँचवटा वडा कार्यालयका मुकाम जोड्ने मुख्य सडक सञ्जालमा समेटिएको उक्त सडकको लम्बाई २३ किलोमिटर छ । संघिय मामिला तथा सामान्य प्रशासन मन्त्रालय अन्तर्गतको ग्रामिण सडक सञ्जाल सुधार आयोजना (आरसीआइपी) ले नगरप्रमुख तिवारीको लामो समयको प्रयासपछि उक्त सडकको कालोपत्रे प्रकृया अघि बढाउन शुरु गरेको हो । आयोजनाले उक्त सडकको कालोपत्रेका लागि वातावरणिय प्रभाव मुल्याङ्कन तथा समुदाय सहभागि योजनाको अध्ययन शुरु गरेको छ । आरसीआइपीले उक्त सडकको (इआइए र सिपिपि) का लागि सिभिल इन्फर्मेटिभ सोलुसनलाई जिम्मा दिइसकिएको र उक्त सडक चालु वर्षभित्रै ठेक्का प्रकृयामा जाने जानकारी दिएको छ । आरसिआइपीले जिम्मा दिएको सिभिल इन्फर्मेटिभ सोलुसनका इन्जिनियरहरु सञ्जिव श्रेष्ठ, विष्णु गौतम लगायतको टोलीले बुधबारदेखि उक्त सडकको स्थलगत अवस्थाको वास्तविक अध्ययन शुरु गरको छ । नगरप्रमुख तिवारीको नेतृत्वमा देविस्थानदेखि लिमिठाना, ठानामौला, भंगरा हुँदै थापाठानासम्म पुगेको टोलीले सडक छेउमा पर्ने मापदण्ड, भौतिक संरचना, बस्ती लगायतको अवस्थाबारे अध्ययन गरेको छ । नगरप्रमुख तिवारीले आफुले निर्वाचनका बेला गरेका बाचा पुरा गर्ने अभियान अन्तर्गत यो सडक कालोपत्रेका लागि निरन्तर खटिएका कारण छोटो समयमा नतिजा हासिल गर्न सफल भएको बताउनुभयो । आरसीआइपीका अनुसार उक्त सडक चालु वर्षभित्रै टेण्डर प्रकृयामा गएर आगामी ३ वर्षभित्रै कालोपत्रे सम्पन्न हुने चरणमा पुग्नेछ । बुधबारदेखि शुरु भएको स्थलगत अध्ययनमा नगरप्रमुख तिवारी सहित नगरको योजना अधिकृत प्रकास लम्साल, पुर्वाधार शाखाका प्रमुख इन्जिनियर प्रबिण गौतम, कन्सल्टेण्ट इन्जिनियरहरु सञ्जिव श्रेष्ठ, विष्णु गौतम लगायत सम्बन्धित वडाका वडाध्यक्षहरु सहभागि हुनुहुन्थ्यो ।