शुक्रबार मौद्रिक नीतिको समीक्षा गर्दै राष्ट्र बैंक

यही शुक्रबार नेपाल राष्ट्र बैंकले मौद्रिक नीतिको अर्धवार्षिक समीक्षा गर्ने भएको छ । केन्द्रिय बैंकको शुक्रबार नै सञ्चालक समितिको बैठक बसेर दिउसो मौद्रिक नीतिको समीक्षा सार्वजनिक गर्ने भएको हो ।

सकेसम्म शुक्रबार नै मौद्रिक नीतिको समीक्षा गर्ने तयारी गरिरहेको राष्ट्र बैंकका एक उच्च कर्मचारीले जानकारी दिए । ‘अहिलेसम्म शुक्रबार ल्याउने तयारी भइरहेको छ, कदम कदाचित सकिएन भने आइतबार त पक्कै आउछ’ उनले भने ।

नेपाल राष्ट्र बैंकले मौद्रिक नीतिको समीक्षाको लागि माघ २० गतेसम्म सरोकारवालाहरुसँग सुझाव मागेको थियो । सरोकारवालाहरुबाट सबै सुझाव आइसकेकोले मौद्रिक नीतिको समीक्षाको लागि राष्ट्र बैंक जुटेको छ ।

मौद्रिक नीतिको समीक्षामा व्यवसायीहरुले तरलता सहज बनाउने र महँगिएको ब्याजदरलाई घटाउने गरी मौद्रिक नीति तर्जुमा गर्नुपर्ने सुझाव दिएका छन् । अहिले ब्याजदर अत्याधिक महँगो भएको हुँदा त्यसले व्यवसायीलाई समस्यामा परेकोले ब्याजदर घटाउने नीति लिनुपर्ने सुझाव दिएका छन् ।

यता शेयर बजारका लगानीकर्ताले पनि शेयर धितो कर्जामा लगाइएको १२ करोड रुपैयाँको सिमा हटाउनुपर्ने, जोखम भार घटाउनुपर्ने सुझाव दिएका छन् । यी सुझावमा राष्ट्र बैंक सकारात्मक देखिएको छ ।

केहि दिनमात्रै गभर्नर महाप्रसाद अधिकारीले समेत अर्थतन्त्रमा सुधार हुँदै गएकोले अफ्ठयारो अवस्थामा लिइएका नीतिहरुलाई विस्तारै परिवर्तन गर्दै जान सकिने बताएका थिए । यसले गर्दा पनि यसपटक दोस्रो त्रैमासिक समीक्षामा केन्द्रिय बैंकले सकारात्मक नीति लिने अपेक्षा गरिएको छ ।