प्रतिनिधिसभाका सभामुख देवराज घिमिरेले संसद्मा रहेका दलहरुबाटै अहिलेको शासन व्यवस्थामाथि खतरा बढेर गएको आरोप लगाएका छन् । उनले संविधानको कल्पनाविपरीत हुने गरी गतिविधि र धारणाहरु संसद् र सडकमा देखिन थालेको टिप्पणी गरे ।
संविधानले राजतन्त्ररहित व्यवस्था अंगीकार गरेको अवस्थामा सरकारमा रहेको पार्टी ‘नेकपा एमालेकै केन्द्रीय सदस्यले मुलुकमा राजतन्त्र चाहिन्छ’ भनेर मेची–महाकाली अभियान गरिरहेकोप्रति उनले आपत्ति जनाए । केही दिनअघि एमाले केन्द्रीय सदस्य एवं मेडिकल व्यवसायी दुर्गा प्रसाईले पूर्वराजा ज्ञानेन्द्र शाहको उपस्थितिमा झापाको पूर्वीनाका काँकडभिट्टाबाट सुरु गरेको मेची–महाकाली अभियानप्रति आपत्ति जनाउँदै सभामुख घिमिरेले भने, ‘नेकपा एमालेका केन्द्रीय सदस्य राजतन्त्र चाहिन्छ भनेर मेची–महाकाली अभियानमा युवाहरुलाई लिएर हिँडेका छन् । यसप्रति सरकारको के दृष्टिकोण हो ? पार्टीको के दृष्टिकोण हो ? स्पष्ट हुन जरुरी छ ।’
शुक्रबार झापाको बिर्तामोडमा सहारा नेपाल साकोसले आयोजना गरेको सभामुखलाई सम्मान तथा पत्रकार भेटघाट कार्यक्रममा बोल्दै सभामुख घिमिरेले वर्तमान राजनीतिक परिस्थिति राष्ट्रको लागि संकट उन्मुख रहेको बताए । उनले भने, ‘हाम्रो संविधानले राजतन्त्ररहित व्यवस्थाको व्यवस्था गरेको छ । तर, संविधान विपरीतका गतिविधिहरु भइरहेका छन् । यस्ता गतिविधिहरु राष्ट्रका लागि कति घातक छन् ? सरकारले ध्यान दिन जरुरी छ ।’
उनले सरकारमा रहेकै केही पार्टीबाट संघीयताप्रति खतरा बढेको भन्दै चिन्ता व्यक्त गरे । सभामुख घिमिरेले संघीयताको मर्मअनुसार सरकारमा पुग्ने तर सरकारमा पुगेर संघीयताविरुद्ध गतिविधि गरेको भन्दै आपत्ति जनाए । ‘हामी संघीयतालाई ठीक ढंगले कसरी कार्यान्वयन गर्न सकिन्छ भनेर लागिरहेका छौं । स्थानीय तहदेखि नै कसरी बलियो बनाउने भनेर नियम, कानुन बनाउने काममा केन्द्रित भएका छौं । यसका लागि कर्मचारीको व्यवस्था । मोनिटरिङको व्यवस्था । जनताको सहभागिताको व्यवस्था । पार्टीको सहभागिताको व्यवस्थाबारे सोचिरहेका छौं । शक्ति दुरुपयोग नहोस भनेर काम गरिरहेका छौं,’ उनले भने, ‘तर केही पार्टीहरुले संसद्भित्रै संघीयता खारेज होस भनेर आवाज उठाइरहेका छन् । त्यसमा पनि सरकारमा बसेको पार्टीबाटै यस्तो अभिव्यक्ति आइरहेको छ । जसले सरकारमा बसेर संघीयता कार्यान्वयन गर्नुपर्ने हो उसैले संघीयताविरोधी गतिविधि र अभिव्यक्ति दिइरहेको छ ।’
प्रतिक्रिया