पाँचथरको फालेलुङ गाउँपालिका केन्द्र रहेको ठाउँको नाम परिवर्तन गरिएको छ । गाउँ कार्यपालिकाको बैठकले साविक नाम थोक्लिम्बालाई परिवर्तन गर्दै थकेपुङ कायम गर्ने निर्णय गरेको हो ।
गाउँपालिकाले शुक्रबार राजपत्रमा सूचना अबोप्रान्त फालेलुङ गाउँपालिका केन्द्र रहेको स्थानलाई थकेपुङमा परिवर्तन गरेको जानकारी गराएको हो ।
गाउँ कार्यपालिकाको माघ २२ गते बसेको बैठकले उक्त निर्णय पारित गरेको प्रमूख प्रशासकीय अधिकृत डम्बर आङदेम्बेले जानकारी दिए । नाम फेरिए पनि केन्द्र रहेको ठाउँ नफेरिने उनको भनाइ छ ।
हाल गाउँपालिका केन्द्र रहेको स्थानलाई परापूर्वकालदेखि थकेपुङ भनिँदै आएकोमा अपभ्रंशस गरी थोक्लिम्बा भनिन थालेको भन्दै विरोध हुने गरेको थियो ।
गाउँ कार्यपालिकाको निर्णय अनुसार राजपत्रमा सूचना प्रकाशन भएसँगै अबोप्रान्त उक्त स्थानलाई बोलिचाली र सरकारी कामकाजसँगै गाउँपालिकाको छापमा समेत ‘फालेलुङ गाउँपालिकाको कार्यालय थकेपुङ पाँचथर’ भनेर लेखिने आङदेम्बेले बताए ।
पाँचथर जिल्लाका अधिकांश ठाँउका नाम लिम्बू जातिको इतिहास र संस्कृतिसँग जोडिएका छन् । तीमध्ये अधिकांश स्थानको नाम अपभ्रंस गरिएको भन्दै पहिचान पक्षधरहरुले दबाबमुलक कार्यक्रम गर्दै आएका छन् । पहिचान संस्कृतिका आधारमा नाम परिवर्तन गरिएको गाउँपालिका अध्यक्ष वीरबिक्रम थाम्सुहाङले बताए ।
प्रतिक्रिया