शैक्षिक क्षेत्रका विकृति र विसंगतीहरू हाम्रो आन्दोलनका निशाना : नवनिर्वाचित अध्यक्ष बडाल

अनेरास्ववियुको ऐतिहासिक २३ औँ राष्ट्रिय महाधिबेशन मार्फत मलाई अमूल्य मत दिई अध्यक्ष पदमा निर्वाचित गराउनुहुने सम्पूर्ण प्रतिनिधि साथिहरू प्रति हार्दिक धन्यवाद ज्ञापन गर्दछु। यस क्रममा मलाई हौसला एवम् सुझाव दिने र सहयोग गर्ने अनेरास्ववियुका समर्थक, विद्यार्थी आन्दोलनका सम्पूर्ण शुभचिन्तक एवम् शैक्षिक तथा प्राज्ञिक वर्गप्रति आभार प्रकट गर्न चाहन्छु। राष्ट्रिय महाधिबेशनबाट निर्वाचित सम्पूर्ण साथीहरूमा हार्दिक बधाई तथा शुभकामना व्यक्त गर्दछु।

नेतृत्व चयनको क्रममा सहभागी प्रतिस्पर्धी साथीहरूप्रति उच्च सम्मान छ। निर्वाचन सांगठनिक जीवन्तताका लागि हुने एक लोकतान्त्रिक पद्धती हो। साझा लक्ष्य प्राप्तिका लागि हामीहरू बीच हुने सहकार्यको सघनता र निरन्तरता सो भन्दा महत्वपूर्ण कुरा हो भन्नेमा हामी सबै सचेत छौँ।

थुप्रै अवसर र चुनौतीहरूको बीच अनेरास्ववियुको नेतृत्व हाम्रो काँधमा आएको छ। वैचारिक प्रष्टता, सांगठनिक अनुशासन र विद्यार्थी केन्द्रित गतिविधिहरूको आधारमा हामी आन्दोलनलाई अगाडि बढाउने छौँ। हाम्रा कार्यक्रमहरूमा शिक्षाको उज्यालो प्रकाशबाट बञ्चित लाखौँ बालबालिकारकिशोरकिशोरीहरूको भावना र खाली खुट्टा विद्यालय गएको हाम्रो विगत प्रतिविम्बित हुनेछ।

विद्यार्थी आन्दोलन भित्रका अन्तरविरोधहरूलाई हामी नविन विचार निर्माणको अवसरको रुपमा लिनेछौँ। अन्य विद्यार्थी संगठनहरूसँग एजेन्डाका आधारमा हाम्रो सघन सहकार्य र स्वच्छ प्रतिस्पर्धा दुवै हुनेछ। विद्यालय देखि विश्वविद्यालयसम्म हरेक तहमा रहेका विकृति र विसंगतीहरू हाम्रो आन्दोलनका निशाना हुनेछन्। आन्दोलनलाई सशक्त, सिर्जनशील एवम् नवप्रवर्तनकारी बनाउन हामी हाम्रो सम्पूर्ण उर्जा र उत्प्रेरणा लगानी गर्नेछौँ। विद्यार्थी आन्दोलनका क्रममा हामीहरूले भोगेको यातना र पीडा यस आन्दोलनको नवप्रवेशी विद्यार्थीले भोग्न नपर्ने वातावरण निर्माण गर्न हामी लाग्नेछौँ।

हामी अनेरास्ववियुको नेतृत्वमा निर्वाचित हुनुले आम विद्यार्थीको जीवनमा के अर्थ राख्छ भन्ने प्रश्नको उत्तर हामी आजैदेखि खोज्ने प्रयत्न गर्नेछौँ। त्यसका लागि नजिकिदै गरेको स्ववियु निर्वाचनमा अनेरास्ववियुलाई ऐतिहासिक सफलता दिलाई यसको हस्तक्षेपकारी भूमिका बढाउन आवश्यक छ। यसका लागि संगठनको सम्पूर्ण पङ्ति परिचालित हुन समेत म अपिल गर्न चाहन्छु।