ललितपुर महानगरपालिकाका प्रमुख चिरिबाबु महर्जनले ललितपुरलाई हरियाली सहर बनाउने योजनाअनुसार काम भइरहेको बताउनुभएको छ ।
बुधबार ललितपुरमा नेपाल स्काउट बागमती प्रदेशले आयोजना गरेको कार्यक्रमलाई सम्बोधन गर्नुहुँदै प्रमुख महर्जनले सो कुरा बताउनुभएको हो । प्रमुख महर्जनले आगामी आर्थिक वर्षदेखि महानगरपालिकाको नेपाल स्काउटको शाखासँग समन्वय र सहकार्य गरी हरियाली सहर बनाउने र ललितपुर महानगरपालिकालाई सुरक्षित सहर बनाउने कुरामा लाग्ने प्रतिबद्धता जनाउनु भयो ।
उहाँले भन्नुभयो, ‘‘अब आउँदो आर्थिक वर्षदेखि ललितपुर महानगरपालिका र ललितपुर महानगरपालिकाको नेपाल स्काउटको शाखासँग समन्वय गरेर काम गर्नेछौँ । हामीले काम गर्नको लागि बजेट कुर्नु आवश्यक छ । त्यसपछि हामी कन्जुसम, महाकांल, बागमती गाउँपालिकाहरूमा स्काउट एक्टिभिटी बढाउन तयार छौँ ।’’
उहाँले महाकांल, बागमती गाउँपालिकाहरूमा पनि महानगरको सहयोगमा स्काउटका कार्यक्रमहरू पुर्याउन प्रतिबद्ध रहने बताउनुभयो । उहाँले ललितपुर महानगरपालिकालाई हरियाली सहर बनाउनका लागि योजना र कार्यक्रम बनाइ काम पनि सुरु गरिसकेको पनि जानकारी दिनुभयो । उहाँले सप्तापातल पोखरीसँग जोडिएको ३२ रोपनी जग्गा नेपाली सेनासँग फिर्ता लिए त्यहाँबाट हरियाली ललितपुरको काम सुरु गरेको बताउनुभयो ।
प्रमुख महर्जनले भन्नुभयो, ‘‘हामीले यो सहर, यो महानगर क्षेत्रलाई हरियालीमा रूपान्तरण गर्न चाहन्छौँ । यसका लागि हामीले धेरै कार्यक्रम र योजना सार्वजनिक गरिसकेको छौँ । सप्तापातल पोखरीसँग जोडिएको ३२ रोपनी जग्गा नेपाली सेनासँग फिर्ता लिएका छौँ, र हामीसँग भएको १५ रोपनी जग्गामा हरियाली र पानीजन्य प्रोजेक्ट सुरु गरिसकेका छौँ । २ वर्ष भित्रमा त्यहाँ हामी कमलको फूल फुलाउनेछौँ ।’’
स्काउट प्रवर्तक लर्ड वेडेज पावेल् तथा लेडी वेडेन पावेलको जन्मोत्सव एवम् यु फाउण्ड थिंकिङ डेको अवसरमा नेपाल स्काउट बागमती प्रदेशले सो कार्यक्रम गरेको हो ।
प्रतिक्रिया