काठमाडौं महानगरको कार्यविधि र निर्देशिका स्वीकृत

राजधानीको मुख्य महानगरपालिकाको रुपमा रहेको काठमाडौं महानगरपालिका कार्यपालिका बैठकले ३ वटा कार्यविधि र एउटा निर्देशन स्वीकृत गरेको छ । फागुन ११ गते महानगरपालिका प्रमुख बालेन्द्र शाहको अध्यक्षमा बसेको १३ औँ कार्यपालिका बैठकले ‘मैतीदेवी मन्दिर व्यवस्थापन कार्यविधि २०७९’, ‘हाँडीगाउँ संस्कृति संरक्षण अक्षय कोष सञ्चालन कार्यविधि २०७९’ र ‘सेवा करारमा कर्मचारी पदपूर्ति गर्ने सम्बन्धी कार्यविधि २०७९’ स्वीकृत गरेको जनाएको छ ।

यस्तै सोही कार्यपालिका बैठकले ‘वाह्य विज्ञापन नियमन निर्देशिका २०७९’ समेत स्वीकृत गरेको छ । बैठकमा विधायन समितिका संयोजक मचाराजा महर्जनले मस्यौंदामा भएको व्यवस्था जानकारी गराउँदै स्वीकृत गर्न पेस गरेका थिए । बैठकले पशुपंक्षी सेवा विधेयक, व्यवसाय दर्ता, नवीकरण तथा नियमन सम्बन्धी कार्यविधि, जनस्वास्थ्य ऐन, राजस्व संकलन तथा परिचालन तर्जुमा गर्न सैद्धान्तिक सहमति दिने निर्णय समेत गरेको छ ।

फागुन ३० गतेदेखि चैत २ गतेसम्म हुने हेल्दी सिटीज समिट इन लण्डन कार्यक्रममा प्रमुख शाहको नेतृत्वमा भाग लिन जाने बैठकले निर्णय गरेको छ । बैठकले वडा कार्यालयको सुरक्षाका लागि नेपाल प्रहरीसँगको सहकार्यमा चौकीदार करारमा लिने, संस्कृति विश्वविद्यालय र हाँडीगाउँमा रहेको जग्गा लिजमा लिएर उपयोग गर्न नेपाल सरकारलाई अनुरोध गर्ने निर्णय पनि गरेको जनाएको छ ।