भारतबाट डिजेल र पेट्रोल मुल्य घटेर आउँदा ग्याँस भने बढ्यो

भारतले पेट्रोलियम पदार्थको नयाँ मूल्य सूचीमा पेट्रोलियम पदार्थको मूल्य घटाएर पठाएको छ । भारतीय आयल निगमले हरेक अंग्रेजी महिनाको १ र १५ तारिखमा अन्तर्राष्ट्रिय बजारमा घटबढ भएको मूल्य अनुसार समायोजित मूल्य सुची पठाउने गर्दछ ।

निगमका अनुसार भारतले पठाएको नयाँ मूल्य सूचीमा पेट्रोल १ रुपैयाँ २१ पैसा घटेर आएको छ भने डिजेलमा ५ रुपैयाँ ५ पैसा घटेर आएको छ । त्यसैगरी मट्टितेलमा प्रति लिटर ३ रुपैयाँ ४० पैसा घटेको नयाँ मूल्य सूची पठाएको छ भने हवाई इन्धनमा भने प्रति लिटर ७ रुपैयाँ ३ पैसा घटेर आएको छ ।

मार्च १ मा पठाएको नयाँ मूल्य सूची अनुसार अधिकांश पेट्रोलियम पदार्थको मूल्य घटेर आए पनि खाना पकाउने एलपीजी ग्याँसको मूल्य भनेर बढेर आएको छ । एलपीजी ग्याँसमा प्रति सिलिन्डर ३ सय ३९ रुपैयाँ ६ पैसा बढेर आएको निगमका सहप्रवक्ता पुष्कर कार्कीले बताए ।

नयाँ मूल्य सूची अनुसार पेट्रोलियम पदार्थ बिक्री गर्दा १५ दिनमा निगमलाई ४४ करोड रुपैयाँ नाफामा रहनेछ । गत फेब्रुअरी १५ को मूल्य सूची अनुसार निगम झन्डै १५ दिनमा झन्डै ७३ करोड रुपैयाँ नाफामा थियो । हाल भारतलाई तिर्न बाँकी बक्यौता रकम १६ अर्ब ३० करोड रुपैयाँ छ । निगमले अन्तर्राष्ट्रिय बजारमा मूल्य घटे पनि आन्तरिक बजारमा मूल्य समायोजन नगरिकन भारतलाई तिर्न बाँकी रकम घटाइरहेको छ ।