कर्मचारीलाई खाजा खाने समय आधा घण्टा

सरकारी कामकाजलाई प्रभावकारी बनाउन सरकारले निजामती र सार्वजनिक सेवाका कर्मचारीहरुलाई कार्यालय समयमा आधा घण्टामात्रै खाजा खाने समय तोकेको छ ।

सार्वजनिक विदा र विदाका दिन कार्यालय खोल्ने प्रस्तावमा कर्मचारीहरुलाई खाजा सम्बन्धी व्यवस्था समेत थपेको जनाएको हो । गत सोमबार मन्त्रिपरिषदबाट निर्णय भएको प्रस्तावमा खाजा समय– दिउँसो १ बजेर ३० देखि २ बजेसम्म तोकिएको छ ।

यसअघि सरकारी कार्यालयहरुमा खाजा खाने समयमा एकरुपता नभएको र कतिपय कार्यालयका कर्मचारीहरुले खाजा खाने समयका नाममा एक घण्टासम्म काम नगरेको भनी आलोचना हुने गरेको थियो ।

त्यसैलाई सम्बोधन गर्दै सरकारले खाजा समय र अरु विदाहरुको व्यवस्थापन गरेको हो । यो निर्णय राजपत्रमा प्रकाशित भएपछि कार्यान्वयन हुनेछ । विदाको दिनसमेत भिडभाड हुने कार्यालयहरु राहादानी विभाग, प्रहरी कार्यालय, स्वास्थ्य कार्यालय, मालपोत कार्यालय, वैदेशिक विभागलगायतका कार्यालयमा सट्टा विदाको व्यवस्था मिलाइएको छ ।