हास्य कलाकार सागर लम्साल ‘बले’ लाई पितृ शोक(भिडियोसहित)

हास्य कलाकार तथा मोडल सागर लम्साल बलेका बुवाको निधन भएको छ । वरिष्ठ लोकगायक समेत रहेका राजेन्द्र लम्सालको पार्थिव शरीरलाई शुक्रबार स्पेनबाट नेपाल ल्याइएको छ । हास्य कलाकार सागर लम्साल बलेका बुवाको १२ दिन अघि स्पेनमा निधन भएको थियो । उनको शवलाई बुझ्न लोक तथा दोहोरी गीत प्रतिष्ठानकी अध्यक्ष रीता थापा मगर, पुर्व अध्यक्ष तथा विभिन्न कलाकार, आफ्न्त तथा शुुभचिन्तकहरु त्रिभुवन अन्तर्राष्ट्रिय विमानस्थलमा पुगेका थिए ।
लम्सालको शवलाई आजै पशुपतिको विद्युतीय गृहमा अन्त्येष्टि गरिएको छ । शवलाई विमानस्थलबाट शवयात्रा गरेर पशुपतिस्थित विद्युतीय शवदाह गृहमा लगिने भएको हो । शवदाह गृह परिसरमै शोकसभासहित श्रद्धाञ्जली दिइएको हो ।
प्रतिष्ठानले वक्तव्य जारी गर्दै लम्सालप्रति श्रद्धाञ्जली व्यक्त गर्नका लागि उपस्थित हुन कलाकर्मीलाई आग्रह गरेको थियो । प्रतिष्ठानको युरोप शाखाका संरक्षक समेत रहेका लम्सालको गत फागुन २३ गते निधन भएको थियो । उनी पिसाबको मुत्र थैलीसम्बन्धी रोगबाट पीडित थिए ।

लम्साल लोक गायन क्षेत्रका पाका गायक हुन् । उनले गाएका दर्जनौं गीत लोकप्रिय छन् । ‘जापान टोकियो’, ‘डोरीको तीन फुदा’, ‘वालिङ फिरफिरे’, ‘शिरमा रिबन सलको पछ्यौरी’, ‘भीरको टुनी हो’, ‘मस्र्याङ्दीको पुल’, ’आमा तिम्रो दूधको भारा’, ‘राइनासकोटको भीर’, ‘निलो पछ्यौरी’ लगायत गीत उनका लोकप्रिय छन् । ‘जापान टोकियो’ उनको सर्वाधिक चर्चित गीत हो । गायकको नाम थाहा नपाएपनि धेरैको मुखमा यो गीत अहिले पनि झुण्डिएको छ ।
२०२० सालमा स्यांजा ज्याग्दीमा जन्मिएका थिए । लम्सालका दुई श्रीमती तीन छोरा छन् । लम्साललाई श्रद्धाञ्जली दिन आर्यघाटमा विभिन्न राजनीतिक दलका नेता, कार्यकर्ता कलाकार, समाजसेवी, पत्रकार तथा आफ्न्तहरुको उपस्थिति थियो ।