बझाङको धानसेरी हिमालमा हिमपहिरो, चार जना बेपत्ता

सुर्मा गाउँपालिकाको यार्चा संकलन क्षेत्र धानसेरी हिमालमा हिमपहिरो जाँदा एक जना घाइते भएको र चार जना पुरिएको हुनसक्ने प्रहरीले जनाएको छ । चार जना केही घण्टादेखि नै बेपत्ता भएकाले उनीहरू पुरिएको हुनसक्ने आकलन गरिएको प्रहरीको भनाइ छ ।

जिल्ला प्रहरी कार्यालयका प्रमुख डीएसपी जागेश्वर भण्डारीले दिउँसो १ बजेतिर हिमपहिरोमा यार्चा संकलकहरु परेको जानकारी आएको र उद्धारका लागि नेपाल प्रहरी र सशस्त्र प्रहरीको टोली त्यसतर्फ पठाइएको जानकारी दिए ।

ुएक जनाको घाइतेको उद्धार गरिएको र अरु चार जना पहिरोमा पुरिएको खबरका आधारमा प्रहरी टोली पठाइएको छ,ु डीएसपी भण्डारीले भने, ुत्यसपछि सम्पर्क हुन सकेको छैन । भोलि प्रहरी टोली घटनास्थल पुगे पछि मात्रै थप विवरण आउला ।ु

उनले हेलिकोप्टर मार्फत उद्धार टोली पठाउने कोसिस भइरहे पनि घटनास्थलको लोकेसनबारे थाहा नभएकाले असहज भइरहेको बताए । सुर्मा गाउँपालिकाकै स्थानीय तिलक पुजाराले हिम पहिरोमा पर्नेको संख्या ६ देखि ७ जना रहेको र दुई जना मृत फेला परेको अपुस्ट खबर आएको बताए ।

बिहान ११ बजेतिर हिमपहिरोमा मानिसहरू पुरिएको खबर गाउँमा आएको थियो । तर घटनास्थलबाट पनि कति मान्छे पहिरोमा परे भनेर यकिन गर्न सकेका छैनन् । उनले त्यस क्षेत्रमा ठूलो संख्यामा यार्चा संकलकहरु पुग्ने भएकाले धेरै मानिसहरु पहिरोमा परेको हुनसक्ने आशंका गरेको कान्तिपुरले लेखेको छ ।