केउरानी वन उपभोक्ता समूहको आयोजनामा चन्द्रागिरी नगरपालिका वडा नम्बर १ दहचोकको तीन पोखरी मयलपानी क्षेत्रमा वृक्षारोपण कार्य सम्पन्न भएको छ ।
केउरानी वन उपभोक्ता समूहले विश्व वातावरण दिवसको अवसरमा विभिन्न प्रजातिका फलफूल तथा चौडा पाते विरुवा रोपी दिवस मनाएको हो ।
कार्यक्रममा सशस्त्र प्रहरी बल बलम्बुु, नेपाल प्रहरी, लायन्स क्लव अफ चन्द्रागिरीका प्रतिनिधि, चन्द्रागिरी नगरपालिका बक्सिङ संघका प्रतिनिधि, स्थानीय बुद्धिजीवि, समाजसेवी, उपभोक्ता, सञ्चारकर्मी तथा स्थानीयहरुको सक्रियतामा करिव ३ सय विरुवा रोपीएको हो ।
समूहका अध्यक्ष गणेश गिरीले विश्व वातावरण दिवसको अवसरमा तीनपोखरी मयलपानी धार्मिक क्षेत्रमा पैदलबाटो स्तरउन्नतीको क्रममा खाली जग्गा निस्केको स्थल, आगलागी र हावाहुरीले पुराना रुख क्षतिभएको स्थलमा उन्नत जातका फलफूल तथा चौडापाते विरुवा रोपिएको बताए ।
अध्यक्ष गिरीले हरिया र चौडापाते विरुवा विस्तार भएसंगै निकट समयमै यस वन क्षेत्रमा आगलागीको जोखिम कम हुने विश्वास व्यक्त गरेका छन् ।
यस क्षेत्रमा हाल सल्लाको वन भएकाले हरेक वर्ष मानविय असावधानीका कारण आगजनी हुने गरेको छ ।
विभिन्न सरोकारवालाहरुको सल्लाह र सुझावका आधारमा सल्ला प्रजातिका विरुवा विस्तारै विस्थापित गरि चिस्यान बढाई पानीका मुहान संरक्षणका लागी अग्ला र चौडा पाते विरुवालाई प्राथमिकतामा राखी वृक्षारोपण गरिएको स्थानीय समाजसेवी दिपक गिरीले बताए ।
वृक्षारोपणका लागि सव–डिभिजन वन कार्यालय थानकोटको सहकार्यमा जिल्ला वन कार्यालय हात्तिसारले अमला, चाप, रुदाक्ष, पैयुँ, पारिजात, तेजपत्ता, ज्याकाराण्डा, कल्की, हर्राे, अम्वा, धुुपी, नास्पती, आरुपखडा, कागती, भोगटेलगायतका विरुवा उपलब्ध गराएको हो ।
संयुक्त राष्ट्रसङ्घीय वातावरण कार्यक्रमको आह्वानमा सन् १९७३ देखि प्रारम्भ भइ हरेक वर्ष जुन ५ मा विश्व वातावरण दिवस मनाउन गरिएको हो ।
यस वर्ष ‘प्लास्टिकजन्य प्रदूषण निर्मूल पारौँ, वातावरणमैत्री विकल्पको उपयोग गरौँ’ भन्ने मूल नाराका साथ दिवस मनाइएको हो ।
प्रकृतिलाई हराभरा बनाई पर्यावरणलाई संरक्षण गर्नु सबैको समान दायित्व भएको भन्दै सार्वजनिक स्थलमा बोटविरुवाको रक्षाका वातावरणलाई कम हानी होस् भन्नेमा सबै पक्ष जिम्मेवार भएर लाग्नुपर्ने चन्द्रागिरी लायन्स क्लव अफ चन्द्रागिरी नगरपालिका लायन्स दीपक रेग्मीले बताए ।
शसस्त्र प्रहरी बल बलम्बुका शसस्त्र प्रहरी नायव निरिक्षक मोहन श्रेष्ठले विश्व वातावरण दिवसको अवसरमा केउरानी सामुुदायिक वन उपभोक्ता समुूह भित्र मयलपानी क्षेत्र, खाली जग्गा र निर्माण गरिएको पैदल बाटोमा विभिन्न प्रजातिका बोटविरुवा रोपिएको बताए ।
मयलपानी धार्मिक क्षेत्रदेखि तीनपोखरी विन्दबासिनी सडक क्षेत्रसम्म विभिन्न जग्गाधनीले वन क्षेत्रभित्र सरोकारवाल पक्ष कसैलाई पनि औपचारिक रुपमा जानकारी नगराई मनोमानी रुपमा परापूर्वकालको गोरेटो बाटोलाई स्तरउन्नती गरेका थिए ।
वन क्षेत्रमा अनुमति विना बाटो स्तरउन्नती गरेको थाहा पाएपछि सव डिभिजन वन कार्यालय थानकोट र चन्द्रागिरी नगरपालिका वडा नम्बर १ कार्यालयलाई तत्काल बाटो निर्माणलाई बन्द गरि वृक्षारोपण गर्ने भन्दै वन समूहले निर्णय गरेको थियो ।
सोही निर्णय बमोजिम विश्व वातावरण दिवसको अवसरमा वृक्षारोपण गरिएको हो ।
प्रतिक्रिया