धरानमा खानेपानी आएसंगै मेयर हर्कको आँसु

स्थानीय चुनावमा खानेपानीको एक सूत्रीय एजेन्डा बनाएर उपमहानगर प्रमुखमा स्वतन्त्र उम्मेदवार बनेका थिए धरान–१८ बुद्धचोकका हर्कराज राई साम्पाङ । जितपछि उनले पहिलो चरणमा साना–साना खोलाखोल्सी छान मार्दै ६ महिना बिताए ।

पहिलो चरणमा उनले पहिचान गरेका ससाना मुहानहरू जब हिउँदमा सुकेर कमिला कुद्न थाले, उनी हानिए कोकाहा खोलातिर । कोकाहा धरान–२० विष्णुपादुकामा पर्छ ।

महाभारत पर्वत शृंखलाबाट निस्कने कोकाहा खोला बराहक्षेत्र मन्दिरनजिकै सप्तकोशी नदीमा मिसिन्छ । सुक्खायाममा पानीको संकट व्यहोर्ने धरानवासीका लागि कोकाहाको पानी ल्याउन उनले अभियान चलाएपछि स्वदेश र विदेश बस्नेले आर्थिक सहयोग गरे, पाइप नै किनेर दिन थालेपछि खानेपानीमा श्रम अभियानले पनि उत्कर्ष लियो ।

धरानबाट करिब ४० किलोमिटर उत्तरी क्षेत्रका भीरपहरा छिचोल्दै बिछ्याइएको ५ इन्चको पाइपबाट सोमबार मध्यरात पकुवामा पानी झार्न सफल भएपछि मेयर साम्पाङ भक्कानिए, खुसीले रोए । उनले गत फागुन २३ देखि यो अभियान थालेका थिए । ९८ औं दिनमा पानी झारेपछि उनले भने, ‘अथक प्रयासपछि कोकाहाको पानी धरान ल्याउन सफल भयौं । यो पानीले २५ देखि ३० हजार उपभोक्तालाई राहत पुग्नेछ ।’

धरानसम्म पानी ल्याउनका लागि करिब ४ करोड रुपैयाँ खर्च भएको छ । हजारौंले श्रमदान गरेका छन् ।धरान खानेपानी व्यवस्थापन बोर्डमा हाल २८ हजारभन्दा बढी उपभोक्ता भएको धरान नगर क्षेत्रमा दैनिक ३ करोड लिटर पानीको माग छ । तर सुक्खायाममा सुर्दु–खर्दु जलाधारको सतहको पानी र चारकोसे जंगलको भूमिगत पानी दैनिक २ करोड लिटर पनि उत्पादन र आपूर्ति हुन नसक्दा खानेपानीको हाहाकार हुने गरेको छ ।

काकाकुल कतिपय उपभोक्ता ट्यांकरबाट पानी ढुवानी गर्न बाध्य हुने गरेका छन् । कोकाहाको पानी धरानसम्म ल्याउनका लागि मुहान पहिचान भएपछि पाइपलाइन विस्तारका लागि श्रम र सर्वे गर्ने काम एकसाथ भएको थियो । यसबीचमा पाइपलाइन बराहक्षेत्र नगरपालिकाको चावाचा क्षेत्र भएर ल्याउनुपर्ने भएपछि दुई स्थानीय तहबीच विवाद पनि भएको थियो ।

प्रमुख राईले कोकाहाको पानी धरानसम्म ल्याउन नदिन धेरैचोटि रोक्न खोजिए पनि आफ्नो अभियान सफल भएकामा स्वदेश र विदेशका दाताहरू, श्रमदानमा सहभागी व्यक्ति र संघसंसथा सबैलाई धन्यवाद दिँदै आभार व्यक्त गरे । उनले भने, ‘खानेपानी ल्याउने श्रम अभियानलाई विभिन्न जालसाज गरेर तुहाउन खोजियो, तर आँधीका रूपमा हाम्रो श्रमदान अघि बढ्यो । कसैले छेक्न सकेन ।’ उनका अनुसार बुधबार पाइपलाइनको ‘एयर लिक’ ९हावा फाल्ने० काम सकिएपछि झन् बढी फोर्समा पानी झर्ने र उक्त पानी बोर्डको सुम्निमा ट्यांकी र स्वस्तिका चोकको ट्यांकीमा झारिनेछ  आजको कान्तिपुरले लेखेको छ ।