चार दिनदेखि बेपत्ता टाइटन पनडुब्बीको भग्नावशेष भेटियो, पाँचै यात्रुको निधन

एट्लान्टिक महासागरमा टाइटन पनडुब्बीको भग्नावशेष फेला परेको छ । यो टाइटानिक जहाजको भग्नावशेषभन्दा १६ सय फिट तल छ । जुन १८ को बेलुकी पनडुब्बी पाइलटसहित चार पर्यटक लिएर टाइटानिकको भग्नावशेष देखाउन गएको थियो । तर १ घण्टा ४५ मिनेटपछि उक्त पनडुब्बी बेपत्ता भएको थियो ।

पनडुब्बीमा सवार पाँचै जना यात्रुको निधन भएको छ । जसमा बेलायती व्यापारी हमिस हार्डिङ, फ्रान्सेली ड्राइभर पल(हेनरी, पाकिस्तानी(ब्रिटिस व्यापारी शाहजादा दाउद, उनका छोरा सुलेमान र ओशनगेट कम्पनीका सीईओ स्टकटन रश पनि परेका छन्। अमेरिकी कोस्ट गार्डका अधिकारीहरूले बिहीबार साँझ यसको पुष्टि गरेका हुन्। तर, अहिलेसम्म उनीहरुको शव भने फेला परेको छैन ।

अमेरिकी कोस्ट गार्डका रियर एडमिरल जोन मौगरले भने, ‘एट्लान्टिक महासागरमा पनडुब्बीको भग्नावशेष रिमोटबाट संचालित गाडीले फेला पारेको हो । पनडुब्बी विष्फोट भएको हुनसक्छ । यद्यपी विष्फोट कहिले भएको हो भन्न यकिन छैन । यसबारे अझै धेरै प्रश्नहरू छन्, जसको उत्तर खोज्न बाँकी छ।

रोयटर्सका अनुसार पनडुब्बीलाई नेपाली समय अनुसार जुन १८ को बेलुकी साँझ ५ः४५ बजे एट्लान्टिक महासागरमा छोडिएको थियो। यो एक घण्टा ४५ मिनेटपछि बेपत्ता भएको थियो। यस पनडुब्बीको खोजी विगत ४ दिनदेखि चलिरहेको थियो, जुन अहिले बन्द गरिएको छ । खोजमा अमेरिका, क्यानडा, फ्रान्स र बेलायतका विमान र जहाजहरू संलग्न थिए।

पनडुब्बीका ५ भाग भग्नावशेषबाट बरामद, विस्फोटको डर

सीएनएनका अनुसार २२ फिट लामो टाइटन पनडुब्बीको ५ भाग भग्नावशेषमा भेटिएको छ । यसमा टेल कोन र प्रेसर हलको २ खण्डहरू रहेका छन्। अमेरिकी कोस्ट गार्डका अधिकारीहरूले अहिलेसम्म भग्नावशेषमा कुनै यात्रुको अवशेष नभेटिएको बताएका छन् । पनडुब्बी निर्माता ओसेन्गेटका अनुसार दुर्घटनामा परी ज्यान गुमाउनेहरू एम्सप्लोरर्स थिए।

कोस्ट गार्डका रियर एडमिरल मोगरले एक रोबोटिक विमानले एट्लान्टिक महासागरमा भग्नावशेष संकलन गर्न जारी राख्ने बताएका छन्। यसमार्फत दुर्घटनाका बारेमा थप जानकारी सङ्कलन गर्ने प्रयास गरिनेछ । तर, समुन्द्रको गहिराइमा मरेका मानिसको बारेमा केही पत्ता लगाउन निकै गाह्रो रहेको पनि उनले जनाएका छन् ।

राडारमा विस्फोटको संकेत भेटियो

बिहीबार अमेरिकी नौसेनाका एक अधिकारीले टाइटानिक जहाजको नजिकैबाट टाइटन पनडुब्बीको अन्तिम लोकेशन रेकर्ड गरिएको बताए। बेपत्ता भएको केही समयपछि रडारमा विष्फोटसँग सम्बन्धित केही संकेतहरू पनि भेटिएका थिए । यो जानकारी तुरुन्तै कमाण्डरलाई खोजी अभियानमा सहयोग गर्न शेयर दिइएको थियो।

जुन २१ मा भग्नावशेष नजिकबाट केही आवाज सुनियो

यसअघि बुधबार अथवा जून २१मा क्यानडाका तर्फबाट खोजी कार्यमा संलग्न एक विमानले सोनार बोयको सहायताले केही आवाज सुनेको थियो । सीएनएनका अनुसार यो टाइटानिकको भग्नावशेष रहेको ठाउँ नजिकै रेकर्ड गरिएको हो। आवाजहरू करिब ३० मिनेटको अन्तरालमा रेकर्ड गरिएको थियो। त्यसपछिको ४ घण्टामा सोनारले फेरि पत्ता लगाएको थियो ।

एजेन्सी ।