प्रधानमन्त्री पुष्पकमल दाहाल प्रचण्डले संयुक्त राष्ट्रसंघका महासचिव एन्टोनियो गुटेरसलाई नेपाल भ्रमणको निमन्त्रणा दिएका छन् । प्रधानमन्त्री प्रचण्डले पत्रमार्फत संक्रमणकालीन न्याय प्रक्रिया टुंग्याउने नेपालको प्रयासमा सहयोग र सद्भावका लागि समेत आग्रह गरेका छन् ।
राष्ट्रसंघका लागि नेपाली स्थायी प्रतिनिधि अमृतबहादुर राईले मंगलबार राष्ट्रसंघ मुख्यालयमा महासचिव गुटेरससँग शिष्टाचार बिदाइ भेटका क्रममा प्रधानमन्त्री प्रचण्डको निमन्त्रणपत्र हस्तान्तरण गरेका थिए । ‘प्रधानमन्त्रीले औपचारिक निमन्त्रणा गर्नुभएको चिठी महासचिव गुटेरसलाई हस्तान्तरण गरेँ । नेपालको विकास प्रक्रियामा आगामी दिनमा निरन्तर सहयोगका लागि आग्रह गरेँ,’ कार्यकाल सकेर स्वदेश फर्किने क्रममा रहेका स्थायी प्रतिनिधि राईले नयाँ पत्रिकासँग भने ।
नेपाल भ्रमणका लागि आफू उत्सुक रहेको र भविष्यमा यसबारे कूटनीतिक च्यानलमार्फत छलफल गरिने पनि महासचिवको भनाइ थियो । नेपालको शान्ति प्रक्रियामा संयुक्त राष्ट्रसंघ र तत्कालीन मिसन अनमिनले पुर्याएको योगदानको पनि प्रधानमन्त्रीले प्रशंसा गरेका छन् । महासचिव गुटेरसले नेपालको मौलिक शान्ति प्रक्रिया टुंगोमा पुगोस् भन्ने चाहना व्यक्त गर्दै यसका लागि पूर्ण समर्थन रहने वचनबद्धता व्यक्त गरेको राईले जानकारी दिए । प्रधानमन्त्री प्रचण्डले शान्ति प्रक्रियाको बाँकी काम ९संक्रमणकालीन न्याय प्रक्रिया० टुंग्याउने प्रयासमा सहयोग र सद्भावका लागि प्रयास गर्न स्थायी प्रतिनिधि राईलाई निर्देशन दिँदै आएका थिए । ‘प्रधानमन्त्रीको निर्देशनअनुसार यस विषयमा ध्यानाकर्षण गर्दै आएको छु,’ राईले भने ।
महासचिव गुटेरसलाई यसअघि तत्कालीन राष्ट्रपति विद्यादेवी भण्डारीले पनि निमन्त्रणा गरेकी थिइन् । यसैगरी, नेपालले आयोजना गर्ने तयारी गरेको सगरमाथा संवाद कार्यक्रममा विशिष्ट अतिथिका रूपमा सहभागी हुन नेपालले निमन्त्रणा पठाएको थियो । तर, कोरोना महामारीका कारण नेपालले चार वर्षअघि जलवायु परिवर्तनसम्बन्धी सम्मेलन सगरमाथा संवाद स्थगित गरेको थियो । सन् २००८ मा तत्कालीन राष्ट्रसंघीय महासचिव वान की मुनले नेपाल भ्रमण गरेका थिए ।
स्थायी प्रतिनिधि राईका अनुसार नेपालप्रति राष्ट्रसंघ नेतृत्व सधैँ सकारात्मक छ । उनले एक महिनाअघि पनि महासचिव गुटरेससँग शिष्टाचार भेट गरेका थिए । ‘कोभिड– १९ पछि नेपालको आर्थिक पुनरुत्थानमा विशेष गरी दिगो विकास लक्ष्य हासिल गर्ने प्रक्रियामा र सन् २०२६ पछि नेपाल विकासशील मुलुकमा स्तरोन्नति हुँदै गरेको अवस्थामा हाम्रो विकास प्रक्रियामा सहयोगका लागि महासचिवसँग नेपालले सहयोगको अपेक्षा राखेको जानकारी दिएँ,’ राईले भने, ‘त्यसका लागि नेपाललाई राष्ट्रसंघका तर्फबाट पूर्ण सहयोग र समर्थन हुने प्रतिबद्धता महासचिवले जनाउनुभयो ।’ नेपालले विकास प्रक्रियामा राष्ट्रसंघबाट सहयोग, प्रविधि र विशेषज्ञताको अपेक्षा गरेको छ । ‘आर्थिक समृद्धि र समुन्नति संविधानमै परिभाषित राष्ट्रिय हित हो । यसका लागि अन्तर्राष्ट्रिय समुदायको साथ र सहयोग खोजेका छौँ,’ राईले भने ।
कार्यकाल सकेर आगामी आइतबार स्वदेश फर्किन लागेका राईले अन्तर्राष्ट्रिय समुदायमाझ राष्ट्रसंघमा नेपालको परिपक्व छवि स्थापित रहेको बताए । नेपालको शान्ति प्रक्रिया छोटो समयमा सहज रूपमा करिब–करिब सम्पन्न भएको विषयलाई धेरैले चाखपूर्वक लिएको पनि उनले सुनाए । ‘नेपालले छोटो समयमा हासिल गरेको शान्ति प्रक्रियालाई सबैले नेपालको महत्वपूर्ण उपलब्धि मानेका छन्,’ उनले भने, ‘शान्ति स्थापक मिसनमा नेपाली फौज दोस्रो ठूलो संख्यामा पुग्नु, शान्ति स्थापक मिसनमा नेपाली महिला सुरक्षाकर्मीको संख्या सबैभन्दा धेरै हुनु भनेको नेपालको विदेश नीतिको उपलब्धि हो ।’ नयाँ पत्रिकाबाट
प्रतिक्रिया