भारतको गुवाहाटीमा हुने “डुरान्ड कप प्रतियोगिता–२०२३” फुटबल प्रतियोगितामा सहभागी हुन त्रिभुवन आर्मी क्लब भारत प्रस्थान गरेको छ । भारतीय सेनाको आयोजनामा श्रावण ८ गतेदेखि भाद्र १७ गतेसम्म संचालन हुने उक्त प्रतियोगितामा लिन नेपाली टोली शनिबार त्यसतर्फ प्रस्थान गरेको हो ।
सो क्रममा त्रिभुवन आर्मी क्लबले भारतको ए लेवलका फुटबल क्लबहरु दिल्ली एफसीसँग ९ अगष्ट, चेन्नाई एफसीसँग १४ अगष्ट र हैदरावाद एफसीसँग २२ अगष्ट मा प्रतिस्पर्धा गर्नेछ । प्रतियोगितामा सहभागी हुन पूर्व राष्ट्रिय फुटबल खेलाडी एवं नेपाली सेनाका प्रमुख सेनानी वसन्तराज गुरुङ्गको नेतृत्वमा ४२ सदस्यीय टोली भारतीय वायु सेनाको विमानमार्फत प्रस्थान गरेको हो ।
प्रतियोगिता सम्पन्न भएपश्चात सो टोली भारतीय वायु सेनाको विमानमार्फत नै स्वदेश फिर्ता हुनेछ । उक्त प्रतियोगितामा सहभागी हुन जाने टोलीलाई बलाधिकृत रथी सरोज प्रताप राणाले जङ्गी अड्डामा एक कार्यक्रमका बीच विदाई गरेको बताइएको छ ।
सोही कार्यक्रममा सैनिक तालिम महानिर्देशक उपरथी सन्तोष कुमार ढकालले प्रधान सेनापति महारथी प्रभुराम शर्माको अभिप्राय अनुरुप सम्पूर्ण खेलाडी तथा अफिसियलहरुलाई उत्कृष्ट खेल प्रदर्शनका साथै उच्च अनुशासन कायम गर्न निर्देशन दिएका थिए ।
यस किसिमका सहभागिताले दुई देशबीचको सम्बन्ध प्रगाढ बनाउन सहायक सिद्धमात्र नभई नेपाली सेना र भारतीय सेनाबीचको मित्रता तथा सहकार्यलाई नयाँ उचाईमा पु¥याउने कार्यको लागि कोशेढुङ्गा सावित हुने विश्वास पनि लिइएको छ ।
प्रतिक्रिया