रुरु क्षेत्र गाउँपालिकाले टीकासँगै दोसल्ला ओढाएर सम्मान पत्र दिएपछि कुलचन्द्र ज्ञवालीले विगतको तीतो यथार्थ सम्झिए– रोगले फर्म नष्ट भएर बिउ र विषादीको खर्च माग्न गाउँपालिका पुग्दा आलोचना खेपेर घर फर्किनुपरेको थियो । तर, यसपटक तिनै ज्ञवालीलाई पालिकाले उनले कृषि क्षेत्रमा पुर्याएको योगदानको कदरस्वरूप सम्मान गर्यो ।
‘कम्तीमा स्थानीय सरकारको नेतृत्व गर्नेहरूले किसान सम्झिन थाले,’ उनले भने, ‘आज मूल्यका चोटका बीच कर्मले सम्मान पाएको छ ।’ रुरु क्षेत्र गाउँपालिका– ४ का ज्ञवालीले ५२ रोपनी जग्गामा पाँच वर्षदेखि व्यावसायिक तरकारी खेती गर्दै आएका छन् । उनको परिवारका सबै सदस्य कृषि कर्ममा छन् । उनले गत वर्ष ६३ लाखको तरकारी बेचे ।
सोही कार्यक्रममा रुरु क्षेत्र– २ का चिरञ्जीवी अर्याललाई पनि गाउँपालिकाले सम्मान गर्यो । १९ सय कुखुरा पालेका उनको फर्ममा दैनिक १७ सय अन्डा उत्पादन हुन्छ । नाफाको ग्यारेन्टी, बिमामा किसानको पहुँच अभिवृद्धि तथा बजार र मूल्यको समस्या अर्यालले सुनाए । उनले पालिकाले सानाठूलाको स्तर छुट्याएर अनुदान वितरण गर्नुपर्ने र दाना तथा घाँसमा अनुदान पाए किसानलाई राहत हुने प्रतिक्रिया दिए ।
किसानलाई प्रोत्साहन गर्नु पालिकाको कर्तव्य हो स् यदु ज्ञवाली, प्रमुख, रुरु क्षेत्र गाउँपालिका
आयातित कृषि उपजको सेवनले अहिले अधिकांश घरमा गम्भीर रोगका बिरामी बढिरहेका छन् । यस्तो वेला व्यावसायिक कृषि कर्म गर्दै आएका किसानहरूलाई प्रोत्साहन गर्नु पालिकाको कर्तव्य हो । माटोमा रमाउनेहरूको सम्मानले सबैलाई ऊर्जा प्राप्त भएको छ ।
वार्षिक १६ हजार लिटरभन्दा बढी दूध बिक्री गर्ने रुरु क्षेत्र गाउँपालिका– ५ का बाबुराम श्रेष्ठ, ५० भन्दा बढी बाख्रापालन गरेर वार्षिक साढे चार लाखभन्दा बढीको बिक्री गर्ने रुरु क्षेत्र गाउँपालिका– १ का राजेन्द्र थापालाई पनि उत्पादनमा आधारित उत्कृष्ट कृषकलाई सम्मान गरिएको पशु शाखा प्रमुख अमित ज्ञवालीले जानकारी दिए ।
त्यस्तै, एक सय ४५ बोट सुन्तलाबाट वार्षिक ५० क्विन्टल सुन्तला बिक्री गर्ने रुरु क्षेत्र– ४ का युवराज ज्ञवाली, व्यावसायिक मौरीपालन गर्ने रुरु क्षेत्र– ६ का टेकबहादुर पचभैयाँ र १८ रोपनीमा १३ वटा पोखरी निर्माण गरेर व्यावसायिक माछापालन गर्ने रुरु क्षेत्र– ५ का कृष्णप्रसाद ज्ञवालीलाई पनि गाउँपालिकाले सम्मान गरेको छ । ज्ञवालीले वार्षिक चार लाखभन्दा बढीको माछा बिक्री–वितरण गर्ने गरेका छन् ।
बच्चा र माउ गरेर २७ वटा बंगुरपालन गरेका रुरु क्षेत्र– २ सिर्जना प्रजा सार्की, खुदो र गुणको व्यापारमा अब्बल रुरु क्षेत्र– ३ का चोलानाथ ज्ञवालीलाई पालिकाले सम्मान गरेको छ । ज्ञवालीले वार्षिक १० देखि १५ लाखको कारोबार गर्ने गाउँपालिकाका पशु स्वास्थ्य शाखा प्रमुख ज्ञवालीले बताए । त्यस्तै, ४५ वटा बोटमार्फत वार्षिक दुई लाखको लिची व्यापार गर्दै आएका रुरु क्षेत्र– १ का टेकबहादुर कामीलाई पनि गाउँपालिकाले सम्मान गरेको छ ।
किसानहरूलाई कृषि पेसामा ऊर्जा प्रदान गर्न कृषक सम्मानलाई नियमित गरिने गाउँपालिकाका प्रमुख प्रशासकीय अधिकृत मधुकृष्ण पौडेलले बताए । पौडेलका अनुसार व्यावसायिक कृषि गर्नेहरूका लागि कृषि कर्जामा अनुदान दिने, जग्गा भाडामा लिएर व्यावसायिक कृषि कर्म गर्नेहरूका लागि जग्गा भाडामा अनुदानलगायत, दूधमा उत्पादनमा आधारित अनुदान प्रदान गर्ने गरिएको छ ।
रुरु क्षेत्र गाउँपालिकाका प्रमुख यदु ज्ञवालीले माटोमा रमाउनेहरूको सम्मानले सबैलाई ऊर्जा प्राप्त भएको बताए । गाउँपालिकाले आयातीत कृषि उपजको सेवनका कारण अहिले अधिकांश घरमा गम्भीर रोगका बिरामी बढिरहेको अवस्थामा व्यावसायिक कृषि कर्ममार्फत समृद्धि प्राप्त गरिरहेका किसानहरूलाई प्रोत्साहन गरेको ज्ञवालीले बताए । उनले बेरोजगारीको नाममा गाउँका उर्वर खेतबारी बाँझो बनाएर परदेश पस्ने युवाहरूको अवस्थालाई केही हदसम्म रोक्न कृषि र पशुपालनका योजनाहरू नीति तथा कार्यक्रममा समेटेको बताए । नयाँपत्रिका, टोपलाल अर्याल
प्रतिक्रिया