लायन्स र लियो क्लव काठमाडौंबाट अटिजम केयर सेन्टरलाई सहयोग (भिडियोसहित)

लायन्स क्लव अफ काठमाडौं युनिटि सर्कल र लियो क्लव अफ काठमाडौं युनिटि सर्कल (जिल्ला ३२५ एल) ले अटिजम केयर सेन्टर बलम्बुलाई सहयोग गरेको छ । लायन्स सुभद्रा अधिकारीको जन्मदिनको अवसरमा लायन्स र लियो क्लवले चन्द्रागिरी नगरपालिका बलम्बुमा सञ्चालित अटिजम, बौद्धिक अपांगता केयर सेन्टरलाई खाद्यान्न सहयोग गरेको हो ।

लायन्स क्लव अफ काठमाडौं युनिट सर्कल वर्ष २०२३-२०२४ का अध्यक्ष कुमारप्रसाद अधिकारीले आफुहरुले सामाजिक सेवाको भावका साथ सहयोग गरेको बताउँदै आगामी दिनहरुमा समेत निरन्तर रुपमा अटिजम भएका बाललबालिकालाई हेरचाह गर्ने यस सेन्टरलाई सक्दो सहयोग गर्ने प्रतिवद्धता व्यक्त गर्नुभयो । आफुहरुले सेवा भावका साथ समाजमा केही गर्नेहरुका लागि उत्प्रेरणा दिने भन्दै अटिजम भएका बालकालिकाहरुको हेरचाह गर्ने संस्था महिला उत्प्रेरणा विकास मञ्चप्रति धन्यवाद व्यक्त गर्नुभयो ।

खाद्यान्न हस्तान्तरण कार्यक्रममा संस्थाकी अध्यक्ष गीता कुमारी घिमिरेले लायन्स र लियो क्लवलाई आफुहरुको गरेको काममा हौसला प्रदान गर्न सहयोग गरेको प्रति कृतज्ञता व्यक्त गर्नुभयो । कार्यक्रममा लायन्स क्लव अफ काठमाडौं युनिटि सर्कल, लियो क्लव अफ काठमाडौं युनिटि सर्कल, समाजसेवीलगायतको सहभागिता रहेको थियो ।

कार्यक्रममा काठमाडौं युनिटि सर्कल संस्थापक अध्यक्ष रोजिन्द्रराज थापा, प्रथम उपाध्यक्ष दिपक कुमार तामाङ, सचिव निराजन महर्जन, कोषाध्यक्ष गिता पुलामी मगर, लायन्स सदस्य सुभद्रा अधिकारी, सरिता सांगाच्छे, केशव अधिकारी, आरती दुलाल अधिकारी, महिला उत्प्रेरणा विकास मञ्चकी कोषाध्यक्ष निमकला घिमिरे, सदस्य भगवती खत्री र सपना तण्डुकारलगायतको सहभागिता भएको हो ।

यस संस्थाले अटिजम भएका बालबालिकाहरुको क्षेत्रमा काम गर्दै आएको छ । महिलाहरुको आफ्नै सक्रियतामा यस अटिजम भएका बालबालिकालाई स्थानीय स्तरमै थेरापी तथा शिक्षा सिकाई प्रक्रिया मार्फत सेवा दिदैं आएको छ ।