बैवाहिक वर्षगाठमा अटिजम सेन्टरलाई सहयोग

आफ्नो वैवाहिक वर्षगाठ उत्सवको अवसरमा अटिजम केयर सेन्टर बलम्बुलाई एक जोडीले नगद सहयोग हस्तान्तरण गरेका छन् । काठमाडौं जिल्ला चन्द्रागिरी नगरपालिका १ दहचोक गैरीगाँउ निवासी स्वर्गीय दानबहादुर खड्काका नाती, शंकर खड्का र भेदकुमारी खड्काका कान्छा छोरा बुहारी धर्मकुमार खड्का र सृष्टि केसीले अटिजम सेन्टरलाई नगद हस्तान्त्रण गरेका हुन ।

आफ्नो वैवाहिक उत्सवमा अनावश्यक रुपमा रकम खर्च गर्नुभन्दा सामाजिक कार्यमा सहयोग गर्दा पुण्य प्राप्त हुने भन्दै सहयोग गरेको बताएका छन । ७ औं बैवाहिक वर्षगाठको अवसरमा महिला उत्प्रेरणा विकास मञ्चद्धारा सञ्चालित अटिजम, बौद्धिक अपांगता केयर सेन्टर बलम्बुलाई ५ हजार रुपैयाँसहित केही खाद्यान्न तथा खाजा हस्तान्तरण गर्नुभएको हो ।

बुवा शंकर खड्काले शिक्षाका साथै सामाजिक क्षेत्रमा जीवन विताउनु भएको र आफुमा समेत सो भाव रहेको भन्दै छोरा बुहारीले अटिजम सेन्टरलाई सहयोग गर्दा बालबालिकाको शैक्षिक सिकाई प्रक्रियामा केही सहज होस् भनेर सहयोग गरेको बताउनुभयो ।

सृष्टि केसीले अटिजमका क्षेत्रमा राज्यका कुनै पनि तहले ध्यान नदिएको अवस्थामा महिलाहरुले केही रकम संकलन गरेर यो सेन्टर सञ्चालन गरिएको बताउँदै समाजसेवी तथा दयालुमनकारीहरुले यस्तै अवसरका फजुल खर्च कटाएर सहयोग गरेमा समाज रुपान्तरणमा टेवा पुग्ने बताउनुभयो ।

धर्मकुमार खड्का इलाका प्रहरी कार्यालय रुद्रपुर रुपन्देहीमा प्रहरी नायव निरिक्षक पदमा सेवारत हुनुहुन्छ भने सृष्टि केसी शिक्षण पेसाका साथै सामाजिक कार्यमा आवद्ध हुनुहुन्छ । उहाँका दुई सन्तान सेलिन र एलिन रहेका छन् । २०७७ सालमा स्थापना भएको महिला उत्प्रेरणा विकास मञ्चले तीज, दशैं, तिहार तथा विभिन्न उत्सवहरुमा सदस्यहरुबाट रकम संकलन गरी शैक्षिक क्षेत्रमा सक्दोरुपमा सहयोग हस्तान्तरण गर्दै आएको छ ।

तीजमा समेत श्रमिकका छोराछोरीलाई शैक्षिक क्षेत्रमा सहयोग मिलोस भनेर सरकारी विद्यालयका बालबालिकालाई शैक्षिक साम्रगी वितरण गरेको संस्थाले जनाएको छ । पछिल्ला एक वर्ष देखि अटिजम भएका बालबालिका र तीनका परिवारको समस्या देखेर सामुहिक रुपमा हेरचाह गर्दा सहज हुने भएकाले अटिजम केयर सेन्टर स्थापना गरि विभिन्न थेरापी तथा शैक्षिक व्यवहारिक सिकाई प्रक्रिया सुरु गरेको छ ।