अर्थशास्त्र सम्बन्धी प्रतियोगिताको पाँचौं संस्करण सुरु

नेपाल इकोनोमिक्स ओलम्पियाडको पाँचौँ संस्करणको राष्ट्रिय प्रतियोगिताको सुरुवात भएको छ।
विद्यार्थीहरु माझ अर्थशास्त्र, व्यवस्थापन तथा वित्तीय साक्षरताको बुझाइ प्रवर्द्धन, सीप तथा ज्ञानको प्रदर्शन एबम् यी विषयको गहन अध्ययनलाई प्रोत्साहन गर्न आयोजना गरिएको प्रतियोगितामा क्षेत्रीय प्रतिस्पर्धाबाट छनोट भएका शीर्ष ८० विद्यार्थीहरुले फाल्गुन ५, ६ र ७ गते स्वर्ण, रजत र कास्य पदकका लागि प्रतिस्पर्धा गर्नेछन्।

काठमाडौंको एपेक्स कलेजमा ३ दिन सम्म सञ्चालन हुने प्रतिस्पर्धामा सहभागी प्रतियोगीहरूबीच अर्थशास्त्र, वित्तीय साक्षरता र बिजनेस केस समाधानका प्रश्न गरी तीन विधामा प्रतिस्पर्धा गर्नेछन। आज पहिलो दिन अर्थशास्त्र सम्बन्धी परीक्षा र वित्तीय साक्षरता सम्बन्धी खेल हुनेछ।

सन २०१९ बाट विद्यार्थीमा वित्तीय साक्षरताको ज्ञान अभिवृद्धि गर्ने उद्देश्यले सुरुवात गरिएको नेपाल इकोनोमिक्स ओलम्पियाड देशभरकै ठूलो वित्तीय साक्षरता अभिवृद्धिको अभियान हो। नेपालले अन्तर्राष्ट्रिय इकोनोमिक्स ओलम्पियाडमा सहभागिता जनाएको पछिल्ला चार संस्करणहरुमध्य चार संस्करणमानै पदक हात पार्न सफल भएको छ। पाँचै संस्करणको राष्ट्रिय प्रतियोगितामा उत्कृष्ट हुने पाँच जना विद्यार्थीहरुले २०२४ को जुलाइमा हङकङमा ५० राष्ट्र सहभागीले जनाउने अन्तर्राष्ट्रिय इकोनोमिक्स ओलम्पियाडमा नेपालको तर्फबाट प्रतिनिधित्व गर्नेछन् ।