पाल्पामा किशोरीको हत्या भएको आशंका

पाल्पामा एक किशोरीको शव फेला परेको छ । जिल्लाको रिव्दीकोट–१, ख्याहास्थित लप्सीखोला नजिकै मङ्गलवार बेलुकी ५ बजेतिर किशोरीको शव फेला परेको हो ।

स्थानीय शारदा माध्यमिक विद्यालयमा कक्षा १२ मा अध्ययनरत छात्रा पदमा सुनारको शव फेला परेको स्थानीय बासिन्दा रामप्रसाद न्यौपानेले बताउनुभयो । किशोरीको शव क्षतविक्षत अवस्थामा रहेको उहाँले बताउनुभयो । उनको हत्या भएको आशंका गरिएको छ ।

प्रहरीले घटनास्थल पुगेर अनुसन्धान थालेको जनाएको छ । घटनास्थल पुगेर अनुसन्धान भइरहेको जिल्ला प्रहरी कार्यालय पाल्पाका सूचना अधिकारी सुगन्ध श्रेष्ठले जानकारी दिनुभयो ।
जिल्ला प्रहरी कार्यालयको टोली भैरहवाबाट लगिएको तालिम प्राप्त कुकुरसहित अहिले घटनास्थलमा पुगेको छ।

‘हामी अहिले घटनास्थलमै छौँ,’ जिल्ला प्रहरी कार्यालय पाल्पाका डीएसपी सुवर्ण श्रेष्ठले केही बेरअघि नेपालखबरसँग भने, ‘शव रातभर घटनास्थलमै थियो। घटनास्थललाई सुरक्षित राखिएको छ। हामी भर्खरै तालिम प्राप्त कुकुरसहित आएका छौँ।’

अहिले पाल्पाका प्रहरी प्रमुख एसपी नरेन्द्र चन्द, डीएसपी श्रेष्ठसहितका प्रहरी अधिकारी घटनास्थलमै छन्।

‘घटनाको हामी सबै कोणबाट अनुसन्धान गर्ने छौँ,’ डीएसपी श्रेष्ठले भने, ‘हत्यारा उम्किँदैन।’

एकान्त ठाउँमा आफूमाथि बलात्कारको प्रयास हुँदा उनले प्रतिकार गर्दा हत्या भएको अनुमान स्थानीयले गरेका छन्। प्रहरीले भने अनुसन्धान पछि मात्रै घटनाको वास्तविकता खुल्ने जनाएको छ।