पर्वतको ध्रुव नमुना माविलाई नेष्डो नेपालको सहयोग

ग्रामीण इलाकाका धेरै सामुदायिक विद्यालयहरु विद्याथी संख्याको अभावमा वन्द हुने स्थितीमा रहेका छन् । बढदो बसाई सराई, नीजि विद्यालयप्रतिको आर्कषण, शैक्षिक गुणस्तरको खोजी जस्ता कारणले यस्तो स्थिती सृजना भएको हो । पर्वत जिल्लाको फलेवास नगरपालिका वडा नम्बर ५ चितीपानीस्थित ध्रुव नमुना माध्यामिक विद्यालयको सञ्चालनमा अहिले समस्या सृजना भएको छ । कुनै समय जिल्लाकै नमुना विद्यालयको रुपमा रहेको यस विद्यालय हाल वन्द हुने स्थितीमा पुगे पछि विद्यालय व्यवस्थापनले पुर्ण आवसीय रुपमा अध्यापनको शुरुवात गरेको छ । स्थानीय समुदायका चार जना मात्र विद्यार्थी रहेको यस विद्यालयमा पर्वत, वाग्लुङ्ग, कास्की, स्याङ्गजा, रोल्पा, रुकुमलगायतका विभिन्न स्थानबाट हाल आवसीय रुपमा अध्यायन गर्न आएका ३२ जना गरी कुल ३६ जना विद्यार्थी रहेका छन् ।

यसैबीच शैक्षिक तथा सामाजिक क्षेत्रमा क्रियाशिल संस्था नेष्डो नेपालले २९औं वैधानिकता दिवस पारेर विद्यालयका अध्यायन छात्रछात्रालाई झोला, पोषाक र शैक्षिक तथा स्टेशनरी सामाग्री वितरण गरेको हो । संस्थाद्वारा वितरीत सामाग्री फलेवास नगरप्रमुख गंगाधर तिवारी, नेष्डो नेपालका संस्थापक अध्यक्ष विश्व प्रकाश प्रसाई, विद्यालय व्यवस्थापन समितिका पुर्व अध्यक्ष मोती प्रसाद पौडेललगायतले वितरण गर्नु भएको छ । यसै गरी शैक्षिक सामाग्रीहरुको अलवा संस्थाले विद्यालयलाई थप नगद २० हजार रुपैयाँ र नेष्डो नेपालका महासचिव प्रेम प्रसाद पौडेलले ८ हजार १ सय रुपैयाँ नगद सहयोग गर्नु भयो ।

कार्यक्रममा नेष्डो नेपालका संस्थापक अध्यक्ष विश्व प्रकाश प्रसाईले निरन्तरताको लागि चुनौती भए पनि विद्यालयले समुदाय वाहिराका विपन्न परिवारका बालबाललिकालाई निःशुल्क आवशीय प्रवन्ध मिलाई पठन पाठन गर्नु सह्रानीय भएको बताउनु भयो । उहाँले सबैको साथ र सहयोग भएमा व्यवस्थापनको नयाँ नमुनाको रुपमा विद्यालय स्थापित हुन सक्ने बताउनु भयो । प्रसाईले जहाँ दुःख, त्यहाँ नेष्डो नेपाल भन्ने मान्यताको विकास भए अनुरुप विद्यालयसंग सहकार्य गरिएको स्पष्ट पार्नुभयो ।

कार्यक्रममा फलेवास नगरपालिकाका नगरप्रमुख गंगाधर तिवारीले नगरपालिका भित्र दुई विद्यालय संकटको अवस्थामा रहेको भन्दै विद्यालयले शुरुवात गरेका पुर्ण आवसीय व्यवस्थापनलाई प्रोत्साहन गर्न शिक्षक दरवन्दी नचलाएको बताउनु भयो । उहाँले समुदायले एक पटक चुनौती वहन गर्न खोजेकोमा खुशी व्यक्त गर्दै नेष्डो नेपाल जस्ता सामाजिक संघसंस्थाको सहयोग भएमा विद्यालय अगाडी वढन टेवा पुग्ने बताउनु भयो ।

कार्यक्रममा नेकपा समाजवादीका केन्द्रिय सदस्य मोती प्रसाद पौडेलले विद्यालयलाई नेष्डो नेपालले शैक्षिक सामाग्री सहयोग गरेर संकटको अवस्थामा गुन लगाएको भन्दै भोलिको दिनमा सबैको सहयोग भएमा विद्यालयलाई सुचारु सञ्चालन गरेर देखाउने प्रतिवद्धता व्यक्त गर्नु भयो ।

कार्यक्रममा नेष्डो समृद्ध लघुवित्त वित्तीय संस्था लिमिटेडका अध्यक्ष सावित्री खत्री क्षेत्रीले समुदायले शुरुवात गरेको पहल सह्रानीय भएको भन्दै आफ्नो क्षेत्रवाट सदा सहयोग रहने जिकिर गर्नुभयो । कार्यक्रममा नेष्डो नेपालका महासचिव प्रेम प्रसाद पौडेल, नेपाल किसान महासंघ पर्वतका अध्यक्ष रघुनाथ गौडेल, नेपाल प्रेस युनिएन पर्वतका अध्यक्ष उत्तम प्रसाद अधिकारी, रोटरी क्लव अफ पर्वतका अध्यक्ष योगराज गिरी, विद्यालय व्यवस्थापन समितिका अध्यक्ष दिपक शर्मालगायतले विद्यालय सञ्चालनको विविध पक्षको बारेमा चर्चा गर्नु भएको थियो ।

कार्यक्रम नेष्डो नेपालका संस्थापक अध्यक्ष विश्व प्रकाश प्रसाईको अध्यक्षता, विद्यालयका प्रधानध्यापक झलक शर्मा पौडेलको स्वागत एवम् नेष्डो नेपालका जनसम्पर्कक अधिकृत इश्वरी प्रसाद शर्माको सञ्चालनमा सम्पन्न भएको थियो ।
बीचैमा पढाई छाडेका आर्थिक अवस्था कम्जोर भएका बालबालिका पत्ता लगाई विद्यालयसम्म ल्याउने काममा राजु पौडेल र रामचन्द्र पौडेलको टूलो भूमिका रहेको स्थानियको भनाई छ ।