संखुवासभामा ढुङाले लागेर एकै परिवारका दुई जनाको मृत्यु

संखुवासभाको सिलिचोङ गाउँपालिका १ स्थित सिसुवाको दिलुवा दोभानमा माथीबाट झरेको ढुङाले लागेर एकै परिवारका दुई जनाको घटनास्थलमै मृत्यु भएको छ । घटनामा एक जना गम्भीर घाइते भएका छन् ।

घटनास्थलमा मृत्यु हुनेमा ४९ वर्षिय मोतिमाया राई र उनकी बुहारी २५ वर्षिया समिक्षा राई रहेका छन । ३२ वर्षिया छोरी रविना राई भने ढुंगा लागेर गम्भीर घाईते भएको सिलिचोङ गाँउपालिका अध्यक्ष भुपालराज मेवाहाङले बताउनुभयो ।

रविनालाई थप उपचारका लागि आज दिउँसो सेनाको हेलिकप्टरबाट काठमाडौ ल्याईएको छ । उनको दाहिने खुटा ढुंगाले लागेर चुँडिएको स्थानियवासीले बताएका छन । आफ्नै घरमा सुतिरहेका ६ जनाको परिवार माथि पहिरो सहित खसेको ढुंगा लागेको पालिका अध्यक्ष मेवाहाङले जानकारी दिनुभएको छ ।

४ वर्षिय बालक सहित परिवारका तीन जना भने सकुशल रहेका छन् । ढुङाले घरमा समेत क्षति पुर्याएको बताइएको छ ।