बंगलादेशमा विद्यार्थी आन्दोलनले उग्ररूप लिदै, हालसम्म प्रदर्शनमा परी कम्तीमा २५ जनाको मृत्यु

बंगलादेशमा सरकारी जागिरमा कायम आरक्षण र कोटा प्रणालीको विरोधमा भइरहेको प्रदर्शन झन् चर्किएको छ । विश्वविद्यालयका विद्यार्थीहरूले गरेको प्रदर्शन देशव्यापी भएको छ ।

बंगलादेशका विभिन्न भागमा गरी हालसम्म कम्तीमा २५ जनाको मृत्यु भएको छ । झडपमा सयौँ घाइते भएका छन् । प्रधानमन्त्री शेख हसिनाको सम्बोधन पछि पनि प्रदर्शन रोकिएको छैन । आन्दोलनमा उत्रिएका विद्यार्थीलाई धैर्य रहन उनले आग्रह गरेकी थिइन् ।

उनले अदालती प्रक्रियाबाट सबैले न्याय पाउने पनि बताएकी थिइन् । तर, उनको सम्बोधन पछि प्रदर्शन झन् देशव्यापी बनेको छ । देशका विभिन्न स्थानमा इन्टरनेट सेवा बन्द गरिएको छ ।