क्रोएसियाको एक नर्सिङ होममा गोली चल्दा ६ जनाको मृत्यु

क्रोएसियाको एक नर्सिङ होममा गोली चल्दा ६ जनाको मृत्यु भएको छ । एक व्यक्ति नर्सिङ होममा प्रवेश गरी वृद्धवृद्धाहरु माथि अन्धाधुन्द गोली चलाएको अन्तर्राष्ट्रिय सञ्चार माध्यमहरूले जनाएका छन् । गोली प्रहरबाट ५ जनाको घटनास्थलमै र एक जनाको उपचारको क्रममा मृत्यु भएको बीबीसीले जनाएको छ ।

घटनामा केही घाइते भएका छन् । चारजना घाइतेहरुको अवस्था गम्भीर रहेको प्रहरीले जनाएको छ । गोली प्रहार गर्ने व्यक्तिलाई प्रहरीले पक्राउ गरेको छ । उनको साथबाट अवैधानिक बन्दुक बरामद भएको छ । उनी सेवानिवृत्त सैन्यकर्मी भएको खुलेको छ । तर, उनले गोली चलाउनुको कारण भने खुलिसकेको छैन ।

क्रोएसियाका राष्ट्रपति जोरान मिलानोभिक र प्रधानमन्त्री आन्द्रेज प्लेनकोभिकले घटनाबाट स्तब्ध भएको भन्दै दोषीलाई कानुन बमोजिम कडा कारबाही गर्ने बताएका छन् । राष्ट्रपति मिलानोभिकले बन्दुक राख्न पाउने नियमलाई अझै कठोर बनाउन आह्वान गरेका छन् ।