नेपाली टेबलटेनिस खेलाडी श्यान्टु श्रेष्ठ पेरिस ओलम्पिक २०२४ को पहिलो खेलमै पराजित भएका छन् । प्रारम्भिक चरण अन्तर्गत शनिबार भएको खेलमा २४ वर्षीय श्यान्टु सेनेगलका खेलाडी ३२ वर्षीय इब्राहिम डियाबसँग ४–० ले पराजित भएका हुन् ।
पहिलो गेममा श्यान्टुले इब्राहिमलाई कडा टक्कर दिएका थिए । तर १०–१० को अवस्थाबाट इब्राहिमले लगातार दुई अंक जोड्दै पहिलो गेम १२–१० ले आफ्नो पक्षमा पारेका थिए । त्यसपछि भने श्यान्टुको प्रदर्शन फितलो बन्यो । छनोट चरण पार पारेर ओलम्पिक खेल्ने तेस्रो नेपाली खेलाडी बन्दै इतिहास रचेका श्यान्टुको ओलम्पिक यात्रा भने पहिलो खेलबाटै समाप्त भएको छ ।
यसैबीच, पेरिस ओलम्पिक अन्तर्गत नेपालका ब्याडमिन्टन स्टार प्रिन्स दाहाल पनि समूहको पहिलो खेलमा सोझो सेटमा पराजित भएका छन् । समूह ‘पी’ मा रहेका प्रिन्स विश्व वरियतामा दोस्रो नम्बरमा रहेका डेनमार्कका भिक्टर एक्सेलसन विरुद्ध सोझो सेटमै पराजित भएका हुन् । प्रिन्सले अझै दुई खेल खेल्न बाँकी रहेको छ ।
ओलम्पिकमा नेपालका स्यान्टु र प्रिन्स सहित जुडोकी मनिता श्रेष्ठ प्रधान, एथलेटिक्सकी सन्तोषी श्रेष्ठ, पौडीका एलेक्स शाह र डुवाना लामा तथा सुटिङकी सुस्मिता नेपाल सहभागी छन् ।
प्रतिक्रिया