काठमाडौं, साउन १४ गते । प्रस्तावित निर्वाचन आयुक्त कृष्णमान प्रधानबारे निर्णय गर्न संघीय संसद्को संसदीय सुनुवाइ समितिको बैठक बोलाइएको छ । आज बिहान साढे ११ बजे बस्ने गरी बैठक बोलाइएको छ । गत असार २ गते बसेको संवैधानिक परिषदको बैठकले प्रधानलाई निर्वाचन आयुक्तमा नियुक्त गर्न सिफारिस गरेको थियो ।
समितिले उजुरी आह्वान गर्दा एक महिलाले प्रधानले आफूलाई यौनशोषण गरेको उजुरी दिएकी थिइन् । त्यसपछि सुनुवाइ समितिले उजुरीकर्तासँग र प्रधानसँग छलफल गरेको थियो । साउन ९ गते प्रधानसँग छलफल गरेपछि समितिको बैठक स्थगित गरिएको थियो ।
समितिको बैठकमा प्रस्तावित निर्वाचन आयुक्त प्रधानले आफ्नो अनुभव, योग्यता, क्षमता सहितको योजना सम्बन्धी अवधारणा र कार्य योजना प्रस्तुत गर्नुभएको थियो । प्रधानको अवधारणा र कार्य योजना सुनेपछि समिति सदस्यले उच्च नैतिक व्यक्ति रहनुपर्ने निर्वाचन आयोगजस्तो संवैधानिक निकायमा उजुरीमा उठाइएका प्रश्नको स्पष्टीकरण मागेका थिए ।
समिति सदस्यहरूले सर्वसम्मत निर्णय हुने दाबी गरेका छन् । समितिले नाम स्वीकृत गरे प्रधानलाई निर्वाचन आयुक्त बन्ने बाटो खुल्ने छ भने अस्वीकृत गरे नियुक्तिको ढोका बन्द हुने छ ।
प्रतिक्रिया