काठमाडौं । लगातार बढीरहेको सुनको भाउमा एकाएक भारी गिरावट आएको छ । सुनको भाउ तोलको २ लाख रुपैयाँ नै पुग्ने अनुमान गरिएकोमा मूल्य घटेको समाचारले नेपालीहरुले राहतको अनुभव गरेका छन् ।
बिहीबार एकैदिन सुनको भाउ प्रतितोला ४ हजार रुपैयाँले घटेको छ । यससँगै सुनको भाउ प्रतितोला १ लाख ६४ हजार ५ सय रुपैयाँ निर्धारण भएको नेपाल सुनचाँदी व्यवसायी महासंघले जनाएको छ । बुधवार नेपालमा सुन प्रतितोला १ लाख ६८ हजार ५ सय रुपैयाँमा कारोबार भएको थियो ।
त्यस्तै चाँदीको भाउ पनि घटेर २ हजार रुपैयाँभन्दा तल आएको छ । बिहीवार तोलामा ५५ रुपैयाँले भाउ घटेसँगै बुधवार प्रतितोला २०१५ रुपैयाँ रहेको चाँदी बिहीवार १९६० रुपैयाँमा झरेको छ ।
अमेरिकाको राष्ट्रपतिमा डोनाल्ड ट्रम्प निर्वाचित भएपछि त्यसको असर सुन बजारमा परेको अन्तर्राष्ट्रिय सञ्चारमाध्यमहरुले जनाएका छन् ।
अन्तर्राष्ट्रिय बजारमा सुनको भाउ एकैदिन ३.२ प्रतिशत हाराहारीमा घटेको छ । बुधबार सुरुवाती कारोबारमा प्रतिऔंस २७४५ अमेरिकी डलर रहेको सुन बिहीबार सुरुवाती समयमा २६५७ डलरसम्म झरेको छ।
अमेरिकी राष्ट्रपतिमा डोनल्ड ट्रप निर्वाचित भएपछि त्याहाँ डलर मजबुत भएको छ । डलर बलियो हुँदा सुन बजार ठिक विपरित कमजोर भएको हो । डलर र सुन बजार एक साथ बलियो हुन सक्दैनन् । डलर बलियो हुँदा सुन मात्र नभएर कच्चा तेल बजार पनि कमजोर हुने विश्वव्यापी ट्रेन्ड रहेको छ ।
ट्रम्पको पुनरागमनले मुद्रास्फिति बढ्न सक्ने अनुमान गरिएको छ । अमेरिकामा ब्याजदर घट्दै जाने अनुमानले सुनमा लगानी आकर्षित भएको थियो, तर अबमा दिनमा मुद्रास्फिति बढ्न गएमा ब्याजदर घट्ने सम्भावना कमजोर हुनेहुँदा लगानीकर्ताहरु डलरप्रति आकर्षित भएका हुन् ।
अन्तर्राष्ट्रिय बजारमा लगानीकर्ताहरु डलरप्रति आकर्षित होउनजेल सुनको मूल्य लगातार घट्ने अनुमान गरिएको छ । आगामी दिनमा अमेरिकाले लिने नीतिले पनि सुनको मूल्यमा प्रभाव पार्ने छ । यस अघि तोलाको ८० हजारबाट बढेर १ लाख ४० हजार रुपैयाँ हाराहारी पुगेको सुन पुन: घट्दै एक लाख हाराहारीमा आएको थियो । अहिले पनि १ लाख २० हजार बाट बढ्न थालेको सुनको भाउ १ लाख ७० हजार रुपैयाँसम्म पुगेर घट्न थालेको छ । भोलिका दिनमा सुनको भाउ पुन: एक लाख २० वा ३० हजार हाराहारीमा झर्न सक्ने अनुमान गरिएको छ । १ लाख ३० हजारसम्म आउन समय लागे पनि अवको केही समयमै नेपालमा सुनको भाउ डेढ लाख रुपैयाँ हाराहारीमा आउन सक्ने धेरैको विश्लेषण छ ।
प्रतिक्रिया