रविमाथि अनुसन्धान गर्न चौथोपटक म्याद थप, १३ दिन हिरासतमा राख्न अनुमति

काठमाडौं । राष्ट्रिय स्वतन्त्र पार्टीका सभापति रवि लामिछानेलाई थप १३ दिन हिरासतमा राख्न अदालतले अनुमति दिएको छ ।

जिल्ला अदालत कास्कीका न्यायाधीश नवराज दाहालको इजलासले आइतबार जिल्ला प्रहरी कार्यालय कास्कीलाई रवि लामिछानेलाई थप १३ दिन हिरासतमा राख्न अनुमति दिएको हो ।

सहकारी ठगी प्रकरणमा अनुसन्धानका लागि २ कात्तिकमा पक्राउ परेका लामिछानेमाथि प्रहरीले सहकारी ठगीसँगै संगठित अपराध र सम्पत्ति शुद्धीकरण मुद्दामा पनि अनुसन्धान गरिरहेको छ ।

योसहित रविलाई चार पटक म्याद थप गरिएको छ । चौथो पटक थपिएको म्याद अहिलेसम्मकै सर्वाधिक धेरै हो । यस अघि ७ देखि १० दिनसम्मको म्याद थप गर्दै अनुसन्धान अघि बढिरहेको थियो । प्रहरीले रविलाई २५ दिन हिरासतमा राख्न अनुमति मागेको थियो ।