बेनीमा मानव कंकाल फेला, बेपत्ता परियारको भएको आशङ्का

म्याग्दी, साउन २८ गते । म्याग्दीको बेनी नगरपालिका वडा नम्बर ९, आँखखेत कालिमुलस्थित जङ्गलमा आइतबार मानव कंकाल र केही सामग्री फेला परेको छ । फेला परेको मानव शरीरको अस्थिरपञ्जर विगत ८ महिनादेखि बेपत्ता स्थानीयवासी १९ वर्षीय मिना परियारको भएको आशङ्का गरिएको छ ।

स्थानीयले दिएको सूचनाका आधारमा आइतबार साँझ जिल्ला प्रहरी कार्यालय म्याग्दीका प्रमुख प्रहरी नायब उपरीक्षक भरत श्रेष्ठ, जनप्रतिनिधि र चिकित्सकसहित पुगेको प्रहरीको टोलीले फेला परेको कंकाल र अन्य सामग्री सङ्कलन गरेको थियो । मानव कंकाल फेलापरेको उक्त स्थान गिठेनी पोखरा वस्तीदेखि करिब दश मिनेटको दूरीमा पर्दछ ।

माटोमुनी गाडेको अवस्थामा शव फेला परेको र घटनास्थलमा फेला परेका सबै सामग्रीहरु सङ्कलन गरेर बेनी ल्याइएको प्रहरीले जनाएको छ । प्रहरी नायब उपरीक्षक श्रेष्ठले भने, ‘प्रहरी टोली पुगेर माटो मुनी गाडिएको अवस्थामा रहेको शवलाई निकालेर ल्याएका छौं । सङ्कलन भएको कंकाल र सामग्री बेनी अस्पतालमा राखेका छौं । मानव कंकाल र अन्य प्रमाणहरुको परक्षीणका लागि राष्ट्रिय विधि विज्ञान प्रयोगशाला काठमाडौँमा पठाउँछौं ।’ आफन्त र स्थानीयवासीहरुले उक्त मानव अस्थिपञ्जर बेपत्ता परियारकै भएको आशङ्का गरेको उनको भनाइ छ ।

फेला परेको मानव कंकाल र सामग्री विगत ८ महिनादेखि बेपत्ता परियारको भएको हुनसक्ने वडाध्यक्ष चक्रबहादुर केसीले बताए । उनले भने, फेला परेको सुनको सिक्री, चप्पल र कपाल बेपत्ता परियारकै भएको परिवारले दावी गरेका छन् । बाँकी कुरा अनुसन्धानपछि पहिचान होला ।’’