डोटीमा पहिरोमा च्यापिएर श्रीमान–श्रीमती घाइते

भदौ २८ गते । डोटीमा पहिरोले पुरिएर दुई जना घाइते भएका छन् । अविरल वर्षापछि गए राति घर माथिबाट खसेको पहिरोमा पुरिएर श्रीमान् – श्रीमती घाइते भएका हुन् ।

जिल्लाको बडीकेदार गाउँपालिका–४ टिमुरेका ४५ वर्षीय तुलाराम जेठारा र उनकी ४० वर्षीय भागरथी जेठारा घाइते भएको प्रहरीले जनाएको छ ।डोटीका निमित्त प्रमुख, प्रहरी नायब उपरीक्षक भीमलाल भट्टराईका अनुसार घरमा सुतिरहेका बेला खसेको पहिरोले दुवै जना घाइते भएका हुन् । घाइते मध्ये भागरथीको अवस्था गम्भीर रहेको छ ।

घाइतेलाई च्यापिएको अवस्थामा उद्धार गरिए पनि निरन्तरको वर्षा र परिरहेका कारण उपचारका लागि स्वास्थ्य संस्थासम्म लैजान कठिनाइ भइरहेको प्रहरीले जनाएको छ । सोही पहिरोमा पुरिएर दर्जन बढी खसी बोका र चार गाई गोरु मरेको प्रहरीले जनाएको छ ।