श्रीमतीलाई आफन्त कहाँ पठाएर छोरीको हत्या

उपत्याकाको पुरानो बानेश्वरस्थित टंकप्रसाद मार्गमा डेरा गरी बस्दै आएका रामेछापका ४२ वर्षीय किशोर भण्डारीले आफ्नै छोरीको हत्या गरेका छन् । पछिल्लो समय छोरी शारिरीक रुपमा अशक्त रहेपनि निको बनाउन आफूले केही गर्न नसकेको गुनासो गदैं आएका थिए । भण्डारी पछिल्लो समय मानसिक रुपमा पनि केही ‘डिस्टर्ब’ जस्तो देखिने गरेको प्रहरी अनुसन्धानबाट खुलेको बताएको छ । उनै भण्डारीले शनिबार शारिरीक रुपमा अशक्त सात वर्षीया छोरीको छुरा प्रहारबाट हत्या गरी आफूले पनि आत्महत्या गरेको प्रहरीको प्रारम्भिक अनुसन्धानबाट थाहा हुन आएको प्रहरीले जनाएको छ ।

प्रहरीले भण्डारीकी श्रीमती र छ महिने छोरा पनि रहेको जनाएको छ । आमा छोरालाई भण्डारीले शनिबार बिहानै आफन्तको घरमा पठाएका थिए । उनले घटनाको उद्देश्यअनुसार साथ श्रीमतीलाई छोरासहित पेप्सिकोलास्थित आफन्तकहाँ पठाएको अनुसन्धानमा संलग्न प्रहरीले जनाएका छन् । कोठाभित्रै भण्डारीले पहिला छोरीको हत्या गरेर पछि आफूले पासो लगाएर आत्महत्या गरेको प्रहरीले जनाएको छ ।

प्रहरीले श्रीमती बेलुका पेप्सिकोलाबाट फर्किँदा भित्रबाट कोठाको ढोका लगाइएको बताएको छ । लामो समयसम्म ढोका ढकढक गर्दा पनि नखुलेपछि छिमेकीसहितको सहयोगमा खोलेर हेर्दा भित्र विभत्शय दृश्य देखनुपरेको हो । लगत्तै प्रहरीलाई खबर गरेपछि बानेश्वर बृत्तबाट टोली पुगेर अनुसन्धान थालेका हुन । जिल्ला प्रहरी परिसर काठमाडौँले प्रारम्भिक अनुसन्धानबाट भण्डारीले छोरीको हत्यापछि आत्महत्या गरेको बताएको हो ।
परिवारले गोंगबुमा फार्मेसी सञ्चालनका साथै कस्मेटिकको व्यवसाय समेत थियो ।
घटनामा कसैंको संलग्नता नदेखिएको प्रहरीको प्रारम्भिक भनाई छ । प्रहरीका अनुसार घटनास्थलबाट भण्डारीको १ पानाको मृत्युु पत्र समेत फेला परेको हो । सो पत्रमा छोरीको विषयमा चिन्ता प्रकट गरी भण्डारीले केही गर्न नसकेको, ऋणलगायतको घरासयी व्यवहार जस्ता विषय उल्लेख गरिएको प्रहरीले जनाएको छ । प्रहरीले घटनाबारे थप अनुसन्धान गरेपछि मात्र सबै विषय थाहा हुने बताएको छ ।