कान्तिपुर दैनिकको प्रधान सम्मपादकमा उमेश चौहान नियुक्त भएका छन् । प्रधान सम्पादक सुधीर शर्माले दिएको राजीनामा स्वीकृत गर्दै कान्तिपुर व्यवस्थापनले चौहानलाई आइतबार नयाँ प्रधान सम्पादकको जिम्मेवारी दिएको हो । दुई दशकभन्दा बढी समयदेखि पत्रकारितामा संलग्न चौहान दुई वर्षदेखि कान्तिपुर दैनिकमा सम्पादकको रुपमा कार्यरत थिए ।
कान्तिपुर मिडिया ग्रुपका अध्यक्ष तथा प्रबन्ध निर्देशक कैलाश सिरोहियाले प्रधान सम्पादक शर्माले कान्तिपुरलाई व्यावसायिक पत्रकारिताको उचाईमा पुर्याउन महत्त्वपूर्ण भूमिका खेलेको उल्लेख गरे । उनले यस्तै व्यावसायिक सफलताको थप उचाईमा कान्तिपुरलाई पुर्याउन नयाँ प्रधान सम्पादक चौहानलाई शुभकामना दिए । अध्यक्ष सिरोहियाले रगतको नाताभन्दा एउटै कार्यस्थलमा जोडिएको नाता झन् बढी गहिरो हुने उल्लेख गर्दै शर्मालाई विदाई गर्नुपर्दा आफूलाई धेरै अप्ठेरो भइरहेको बताएको कान्तिपुर दैनिकले लेखेको छ । उनले अहिले संस्थागत आवद्धता छोडे पनि पत्रकारिताका अभ्यासमा बाहिर बसेर पनि कान्तिपुरलाई सल्लाह सुझावहरू दिन शर्मासँग आग्रह गरे ।
शर्माले झण्डै दुई दशकदेखि कान्तिपुरमा जोडिएर पत्रकारिता गर्दा कहिल्यै पनि कुनै दबाब र प्रभावमा नपरेको उल्लेख गर्दै व्यावसायिक रुपमा सक्षम नेतृत्व र पत्रकारहरुको टिमले यो सफलता हासिल गरेको बताए । उनले आगामी दिनमा यसै क्षेत्रमामा रहने र कुनै न कुनै रुपमा कान्तिपुरको शुभेच्छुकको रुपमा जोडिइरहने बताए ।
नवनियुक्त प्रधान सम्पादक चौहानले शर्माले देखाएको पत्रकारिताको व्यावसायिक सिपबाट समेत आफूले सिकेर आगामी दिनमा समाचार कक्षलाई नेतृत्व गर्ने प्रतिबद्धता जनाए । उनले अझै पनि छापा पत्रकारिता उत्तिकै शक्तिशाली रहेको उल्लेख गर्दै यसलाई नयाँ प्रविधिसँग जोडेर लैजान आफूले काम गर्ने पनि बताए ।
अर्घाखाँचीका प्रधान सम्पादक चौहानले पूर्वाञ्चल विश्वविद्यालयबाट आमसञ्चार र पत्रकारिता विषयमा स्नातकोत्तर गरेका छन् । उनीसँग रेडियो र टीभीको पनि कार्यानुभव छ । रेडियो, एबीसी टेलिभिजन, नयाँ पत्रिका दैनिकमा समेत सम्पादनको भूमिका निर्वाह गरिसकेका चौहानले ह्यप्पी न्यूजरुममा विश्वास गर्ने गर्छन ।
प्रतिक्रिया