पदम गिरी स्वास्थ्य मन्त्री बनेसंगै १५ वर्षअघिको कुरा किन सम्झिए टिकाराम भूूसालले ?

टिकाराम भूूसाल
पन्ध्र वर्ष अघि काठमाण्डौ सुन्धाराको एउटा होटलमा गैर सरकारी संस्था महासंघ पश्चिमाञ्चल क्षेत्रिय कमिटीको लागि कार्यालय प्रमुख खोज्ने क्रममा कमरेड पदम गिरीसंघ दुइतिन पटक भेट भयो । एक दिन फलेवासका भोला पौडेलसंगै अलि लामो सम्वाद भयो । उहाँ अनेरास्ववियूको केन्द्रीय नेतृत्वकोलागि प्रयासरत हुनु हुन्थ्यो । हामीले उहाँलाइ पर्वत फर्केर पार्टीको संगठनमा लाग्न अनुरोध गर्यौ ।
उहाँ सहमत हुनु भयो र आफ्नो पार्टीकामको जिम्मेवारी पर्वत सार्नु भयो ।
आउँदैको वर्ष उहाँ जिल्ला कमिटीको सचिवालय सदस्य हुनु भयो । त्यस पछिको जिल्ला अधिवेशनवाट उहाँ जिल्ला कमिटीको अध्यक्ष चुनिनु भयो । अध्यक्ष पदमा कार्यरत रहँदै २०७४ उहाँ प्रतिनिधि सभाको सदस्यमा निर्वाचित हुनु भयो । पहिलो पटक प्रतिनिधि सभा सदस्य रहँदै गतवर्ष उहाँ केन्द्रीय कमिटी सदस्य हुनु भयो ।
एक वर्ष अगाडि भएको जिल्ला अधिवेशनमा जिल्ला कमिटीको नेतृत्व सर्वसम्मत वनाउन योगदान गर्नु भयो । त्यही सर्वसम्मत चयन भएको जिल्ला कमिटीले पर्वत जिल्लालाइ लालकिल्ला वनाउँदै पदम गिरी कमरेडलाइ फेरी प्रतिनिधि सभा सदस्यमा विजय वनायो ।
अहिले पर्वतको पार्टी कामको उच्च सन्मान र कमरेड पदम गिरीको क्षमताको मुल्याङ्कन गर्दै पार्टीले संघिय सरकारको स्वास्थ्य तथा जनसंख्या मन्त्रीमा सिफारीस गरि क्याविनेट मन्त्री वनायो । पार्टीमा काम गरेर कोही अन्यायमा पर्नु पर्दैन “देर हुन सक्छ अन्धेर हुँदैन” ।
पर्वत जिल्लावाट पहिलो पटक क्याविनेट मन्त्री नियुक्त हुनु भएकोमा नेकपा एमालेका केन्द्रीय सदस्य तथा पर्वत जिल्लाका सह इन्चार्ज कमरेड पदम गिरीलाइ हार्दिक वधाइ तथा स्वास्थ्य क्षेत्रमा सवै नेपालीले संधै सम्झिने तथा अनुकरणीय कार्य गर्न सफलताको हार्दिक शुभकामना दिन चाहन्छु ।
त्यसै गरि पर्वत जिल्लालाइ लालकिल्ला वनाउने गरि नेकपा एमालेका उमेदवारको पक्षमा मतदान गर्ने सम्पूर्ण मतदाता‚ पार्टी संगठन र निर्वाचनको वेला रातदिन नभनि खटीने नेता तथा कार्यकर्ताहरु र पर्वत जिल्लाको नेतालाइ मन्त्रीमण्डलमा समावेश गर्ने निर्णय गर्ने केन्द्रीय अध्यक्ष तथा नेतागण प्रति समेत हार्दिक आभार व्यक्त गर्दछु ।