उदयपुरको त्रियुगा नगरपालिकाका नगरप्रमुख वसन्तकुमार वस्नेतले अपर्याप्त बजेटका कारण स्थानीय तहका जनताको आवश्यक्ताअनुसार विकास निर्माणका योजनाहरु सञ्चालन गरी काम गर्न नसकिएको बताउनुभएको छ ।
नगर प्रमुख वस्नेतले स्थानीय तहको दोस्रो निर्वाचनबाट निर्वाचित त्रियुगा नगरपालिकाका जनप्रतिनिधिहरुको एक वर्षे कार्यकाल पूरा भएको सन्दर्भमा नगरपालिकाले भएगरेका विकास निर्माणको कामको समीक्षा तथा प्रगति सार्वजनिकीकरणका लागि विहीबार गाईघाटमा आयोजित पत्रकार सम्मेलनमा सो कुरा बताउनुभएको हो ।
संघीय सरकारले स्थानीय सरकारमार्फत बजेट कार्यान्वयन गराउनु पर्नेमा सोझै माथिबाट सीमित स्रोत साधनमा बाँधेर राख्नेगरेको र स्वीकृत बजेट पनि कटौती गर्ने गरेपछि स्थानीय सरकारले जनताका अपेक्षित काम गर्न नसकेको उहाँको भनाइ छ । उहाँले भन्नुभयो, “मुखले बोल्ने हैन कामले देखाउने ठाउँमा हामी आएका छौं, तर बजेट नहुँदा बिकास निर्माणका योजनाहरु सम्पन्न गर्न बीचैमा खुम्चिनुपरेको छ ।”
एक बर्षे प्रगतिमा नगरपालिकाले आफ्नो बजेटले भ्याएसम्म इमान्दारी साथ बिकासका काममा खर्च गरेको भन्दै गाईघाट बजारलाई आधुनिक सुविधा सम्पन्न बजारका रुपमा स्थापित गराउन योजना बनाइएको, बरुवा त्रियुगा करिडोरमार्फत मदनभण्डारी राजमार्गलाई वाइपास गरेर ट्राफिक जाम कम गर्न ठूला सवारी साधनलाई वाइपासबाट कटाउन लागिएको, वडाबाट सञ्चालित योजनाको प्राविधिकसहितको टोलिले अनुगमन गर्नेगरेको बताउनुभयो ।
नगरपालिकाको कामलाई चुस्त बनाउन गुनासो सुन्ने अधिकृतको ब्यावस्था गरिएको, सर्वसाधारणलाई आप्mनो काममा सहजता होस् भनेर गेटमै नागरिक बडापत्र राखिएको, कुनै कुराको पनि ढाकछोप नगरी सूचनाको पहुँच नागरिक तहसम्म लग्न नगरपालिकामा सूचना केन्द्रको स्थापना गरिएको र भ्रष्टाचाररहित त्रियुगा नगरपालिका बनाउन यस नगरका सम्पूर्ण जनप्तिनिधि र कर्मचारीले हरेक वर्ष आप्mनो सम्पति विवरण अनिवार्य सार्वजनिक गर्नुपने ब्यवस्था गरिएको नगरप्रमुख वस्नेतले बताउनुभयो ।
नगरका असहाय, सुकुम्बासी भूमिहिनहरुलाई घरवास कार्यक्रममार्फत आवास गुह निर्माण गरी वितरण गर्ने कार्यक्रम सञ्चालन गरिएको, पर्यटन क्षेत्रको विकासमा विश्वकै ठूलो शिव लिङ्ग स्थापना, त्रियुगा शान्तिधामको विकास गरिएको, विसनपुर हरित पार्क, बेलदोभान झर्ना आदि ठाउँको विकासमा राम्रो काम गरिएको बताउनुभयो ।
यसैगरी ११ हजार छ सय ४७ मिटर सडकमा कालोपत्रे गरिएको, २१ हजार २५ मिटर नाली निर्माण गरिएको, ४० हजार मिटर कच्ची सडकमा ग्रावेल गरिएको, १० वटा सडकमा करिव सात हजार मिटर नयाँ ट्रयाक खोलिएको र साना ठूलागरी ७७ वटा सार्वजनिक भवन निर्माण तथा २३ वटा कल्भर्ट निर्माण गर्ने काम सम्पन्न गरिएको नगरप्रमुख वस्नेतले बताउनुभयो । -भक्तिविलास पोखरेल
प्रतिक्रिया