बागलुङ महोत्सवको उदघाटन राष्ट्रपति पौडेलबाट

आजबाट बुधबारदेखि सुरु हुने सातौं बागलुङ महोत्सवको तयारी पूरा भएको छ । महोत्सवको उदघाटन राष्ट्रपति रामचन्द्र पौडेलबाट गरिने भएको छ ।

महोत्सव उद्घाटन गर्न आज विहान राष्ट्रपति पौडेल बागलुङ आउने कार्यक्रम तय भएको बताइएको छ । निजी क्षेत्रको छाता संगठन बागलुङ उद्योग वाणिज्य संघको आयोजनामा सुरु हुन लागेको सातौं बागलुङ महोत्सवलाई उद्घाटन गर्न राष्ट्रपति पौडेल बागलुङ आउन लाग्नुभएको हो ।

बजारका विभिन्न स्थानमा स्वागत गेट निर्माण गरिएको छ भने तोरण टाँगेर बजारलाई शृङ्गारिएको छ । महोत्सवको सबै तयारी पूरा भएको छ । बागलुङ उद्योग वाणिज्य संघका अध्यक्ष नरेश कँडेलले भन्नुभयो, ‘‘राष्ट्रपतिलाई स्वागत गर्न बजारबासी आतुर छौं । महोत्सवको उद्घाटन गर्न राष्ट्रपति आउने भएपछि बागलुङबासी उत्साहित भएका छन् ।’’

राष्ट्रपति पौडेलले बुधवार बिहान १० बजे बागलुङ आइपुग्ने संघका अध्यक्ष कँडेलले जानकारी दिनुभयो । उहाँका अनुसार राष्ट्रपति पौडेलले बागलुङको प्रसिद्ध ऐतिहासिक शक्तिपीठ बागलुङ कालिका मन्दिर र बागलुङ नगरपालिका –४ कुँडुलेमा रहेको शालिग्राम संग्रहालयको दर्शन तथा अवलोकन गर्ने कार्यक्रम रहेको छ ।

मन्दिर दर्शनपश्चात दिउँसो १ बजे धौलागिरी बहुमुखी क्याम्पसको मैदानमा राष्ट्रपति पौडेलले महोत्सवको उदघाटन गर्नुहुनेछ । उद्योग वाणिज्य संघको आयोजनामा गण्डकी प्रदेशस्तरीय पर्यटन, कृषि तथा औद्योगिक व्यापार मेला तथा सातौं बागलुङ महोत्सवको आयोजना गरिएको छ ।

महोत्सवको उद्घाटनका अवसरमा विभिन्न जातजातीका झाँकी, स्थानीय कला–संस्कृति, कृषि प्रदर्शनी गरिने भएको छ । महोत्सवमा व्यावसायिक प्रयोजनका लागि एक सयसय ६९ वटा स्टल तयार पारिएको छ । महोत्सवमा बागलुङका स्थानीय उत्पादनको बिक्री–वितरणका लागि स्टलको व्यवस्था गरिएको छ ।

महिला तथा पुरुष भलिबल प्रतियोगितालगायतका खेलको तयारी भएको आयोजकले जनाएको छ । महोत्सवमा ताराखोलाको स्थानीय उत्पादन आलु, अल्लोको कपडा लगायतका उत्पादन, सिगाना र बिहुँको सुन्तला प्रदर्शनी तथा बिक्रीको समेत व्यवस्थापन हुने आशा गरिएको छ । महोत्सवले बागलुङको पर्यटन क्षेत्रमा टेवा पु¥याउनुका साथै आर्थिक कारोबारलाई चलायमान गराउने आशा आयोकको छ ।