देशभरमा १४ जनाले ज्यान गुमाए, तीन जना बेपत्ता

२ दिनदेखि निरन्तर भइरहेको भारी वर्षाका कारण देशभरमा १४ जनाको मृत्यु भएको छ । शुक्रबार रातिदेखिको झरीले बाढी, पहिरो र डुबानमा परी अहिलेसम्म १४ जनाले ज्यान गुमाएका हुन् ।

काठमाडौँमा एक जना, स्याङ्जामा तीन जना, पर्वतमा दुई जना, उदयपुरमा एक जना, काभ्रेपलाञ्चोकमा दुई जना, पाल्पामा एक जना, तनहुँमा तीन जना तथा दाङमा एक जनाको बाढी पहिरोका कारण मृत्यु भएको हो ।

ज्यान गुमाउनेमा काठमाडौँस्थित नागार्जुन नगरपालिका–३ को पहिरोमा पुरिएर गोरखा लखन थापा गाउँपालिका–६ का मनोज बिक रहेका छन् । यस्तै, पहिरोमा पुरिदा उदयपुरस्थित रौतामाई गाउँपालिका–५ का राज राई, काभ्रेपलाञ्चोकको रोशी गाउँपालिका–११ बस्ने जालमाया रुजालमगर र सेतीमाया रुजालको पनि निधन भएको छ ।

यसैगरी, पहिरोमा पुरिएर मृत्यु हुनेमा तनहुँस्थित शुक्लागण्डकी नगरपालिका–७की हिरा नेपाली, अनिशा वास्तोला, श्याम भण्डारी, स्याङ्जा बिरुवा गाउँपालिका–६ स्याङ्दीका गुईश्वरी शर्मा मरासिनी, माधव शर्मा, हरिमाया शर्मा रहेका छन् ।

प्रहरी प्रधान कार्यालय नक्सालका अनुसार पर्वतस्थित फलेबास नगरपालिका–१ कार्किनेटा बस्ने झलकप्रसाद शर्मा, तुलसीप्रसाद शर्मा, पाल्पाको माथागढी गाउँपालिका–६ की रिमा सराहा रानामगर तथा दाङको लमही नगरपालिका–८ बग्रपुर बस्ने मनियम चौधरीको पनि पहिरोमा पुरिएर मृत्यु भएको छ ।

यसकासाथै, बाढी, पहिरो तथा विपद्जन्य घटनामा पुरिएर अन्य तीन जना बेपत्ता भएका छन् भने १८ जना घाइते भएका छन्। बेपत्ता हुनेमा दोलखा गौरीशङ्कर गाउँपालिका–९ का जाङ्मु शेर्पा, दाङको राजपुर गाउँपालिका–२ का राजकुमार यादव तथा स्याङ्जा भिरकोट नगरपालिका–५ ज्यामिरेकी खेमकुमारी मल्ल रहेका छन् ।

अहिलेसम्म तनहुँमा पाँच जना, गुल्मीमा एक जना, ओखलढुङ्गामा दुई जना, काठमाडौँमा तीन जना, चितवनमा एक जना तथा स्याङ्जामा छ जना गरी १८ जना घाइते भइसकेका छन् ।

भारी वर्षाका कारण आइतबार पनि देशभर जनजीवन प्रभावित बनेको छ। कोशी नारायणी लगायत ठूला नदीमा जलसतह उच्च भएको छ भने काठमाडौँ उपत्यकाका नदी, खोला किनारमा आज पनि प्रहरीले गस्ती तथा अनुगमन जारी राखेको छ ।

भारी वर्षाका कारण उपत्यकाको नदीमा पानीको सतह बढेकाले सम्भावित जोखिमलाई मध्यनजर गरी खोला किनारमा प्रहरीले गस्ती गरिरहेको छ । नेपालभर तीनवटै सुरक्षा निकायका सुरक्षाकर्मी उच्च सतर्कताका साथ प्रभावित क्षेत्रमा परिचालन गरिएको हो ।

आज पनि सबै प्रदेशका धेरै स्थानहरूका मेघ गर्जनरचट्याङ्ग सहित हल्कादेखि मध्यम वर्षाको र थोरै स्थानहरूमा भारीदेखि धेरै भारी वर्षाको सम्भावना रहेको जल तथा मौसम पुर्वानुमान महाशाखाले जनाएको छ।

गण्डकी, लुम्बिनी, कर्णाली र सुदुरपश्चिम प्रदेशको एक(दुई स्थानमा अति भारी वर्षाको पनि सम्भावना रहेको जानकारी पनि महाशाखाले दिएको छ । यसकासाथै, ती क्षेत्रमा हुन सक्ने गेग्रान बहाव, बाढी, पहिरो तथा भू(क्षय जस्ता प्रकोपको जोखिम वा क्षतिबाट बच्न तथा यस बाट ती क्षेत्रहरूमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकोले आवश्यक सतर्कता अपनाउन पनि महाशाखाले अनुरोध गरेको छ ।