पोलियोमुक्त घोषणा भएको १० वर्षपछि काठमाडौंमा भेटियो पोलियो भाइरस

काठमाडौं । नेपालमा पोलियो मुक्त घोषणा भएको १० वर्षपछि पोलियो भाइरस भेटिएको छ ।
प्रयोगशाला परीक्षणको नतिजा अनुसार पोलियो भाइरस पोलियो खोपबाट उत्पन्न पोलियो भाइरस पुष्टि भएको परिवार कल्याण महाशाखाका खोप शाखा प्रमुख डा. अभियान गौतमले जानकारी दिनुभयो ।

वातावरणीय निगरानीको क्रममा काठमाडौंको टुकुचा बागमती संगम नजिकबाट संकलन गरिएको ढलको नमूना परीक्षण गर्दा पोलियो भाइरस पत्ता लागेको गौतमले बताउनुभयो ।
टेकु दोवानबाट संकलन गिरिएको नमूना परीक्षण गर्दा पोलियो भाइरस टाइप ‘घ’ को जीवाणु भेटिएको हो ।

नेपालमा १३ वर्ष यता पोलियो भाइरस पुष्टि भएको थिएन।विश्व स्वास्थ्य संगठनले १० वर्ष अघिनै नेपाललाई पोलियो उन्मुलन घोषणा गरिसकेको छ।
डा. गौतमले उपत्यकाका (काठमाडौं, ललितपुर भक्तपुर) को आउने नदीको संगममा पोलियो जीवाणु भेटिएसँगै पोलियो विरुद्धको खोप अभियान सञ्चालन गर्न लागेको बताउनु भयो ।

उपत्यकामा आगामी साउन ९ देखि १२ गते सम्म पोलियो विरुद्धको खोप अभियान सञ्चालन गर्ने डा. गौतमले जानकारी दिनुभयि। जन्मेदेखि पाँच वर्ष मुनिका बालबालिकालाई पोलियो खोप खुवाउने उहाँको भनाइ छ। उहाँका अनुसार खोप स्वास्थ्यकर्मी र महिला समुदायिक स्वास्थ्य स्वंसेविका मार्फत घर घरमा दिइने छ ।

पोलियो भाइरसबाट हुने संक्रमक रोग हो।पोलियो भाइरसबाट संक्रमण भएमा ज्वरो आउने, पखाला लाग्ने, जिउ दुख्ने, थकान महशुस हुने जस्ता लक्षण देखिने डा. गौतम बताउनुहुन्छ। यदि रोगका गम्भीर लक्षण देखिएमा पक्षघातदेखि मृत्यु हुने उहाँको भनाइ छ।

उहाँका अनुसार पोलियो रोग दूषित खाना र पानीको माध्ययबाट एक व्यक्तिबाट अर्को व्यक्तिमामा सर्ने गर्छ।पोलियो रोग जुनसुकै उमेरका मानिसलाई लाग्न सक्ने उहाँ बताउनुहुन्छ।तर, पाँच वर्ष मुनिका बालबालिका बढी पोलियो रोगको जोखिममा हुन्छन्।