ज्यान गुमाउने १३ जनाको सनाखत, ४ जनाको खोजी जारी

कास्कीको पोखरास्थित सेती नदीको खोँचमा आज यति एयरको विमान दुर्घटनामा परेका ६८ जनाको मृत्यु भएको छ । मृतकमध्ये १३ जनाको सनाखत भएको गण्डकी प्रदेश प्रहरी कार्यालयका डीआईजी रामदत्त जोशीले बताएका छन् ।
आइतबार विहान काठमाडौँबाट पोखराका लागि उडेको यति एयर प्रालिको एनवाईटी–६९१ विमान १० बजेर ५० मिनेटमा दुर्घटना भएको थियो । दुर्घटनामा परेर ज्यान गुमाउनेमा पोखरा घर भएका निशान्त आचार्य र काठमाडौँकी संगीता शाहीसहित १३ जना छन् ।
दुर्घटनामा मृत्यु हुनेमा लक्ष्मी पौडेल, २७ वर्षीय सदाकत अलिमिया, ३८ वर्षीय डा. सुशिल श्रेष्ठ, डा. सोना दिवाकर, पर्वत ज्ञयादीका अरुण पौडेल र प्रसिद्धि पौडेल छन् । प्रहरीका अनुसार पूर्ण बहादुर गुरुङ, कुमार गुरुङ, कोरियन नागरिक क्युङ्गचुल यु, विजय कुमार गुरुङ र बागलुङ घर भएकी रचना काफ्ले पौडेलको सनाखत भएको छ । यस्तै नेपाल पत्रकार महासंघका केन्द्रिय सदस्य आर्थर पर्वतका त्रिभुवन पौडेल समेत रहेका छन् ।
विमानमा ६८ जना यात्रु र ४ जना चालक दलका सदस्य सवार थिए । नागरिक उड्डयन प्राधिकरणका अनुसार चालक दलका सदस्यहरूमा क्याप्टेन कमल केसी, अन्जु खतिवडा, सृजना होंगचुन र ओसिन आले मगर सवार थिए । दुुर्घटनामा परेका मध्ये ४ जनाकोखोजी कार्य जारी रहेको प्रहरीले जनाएको छ ।