चिकित्सकहरुको नाम दर्ता प्रमाणपत्र लाइसेन्स परीक्षामा ५३ प्रतिशत फेल भएका छन् । नेपाल मेडिकल काउन्सिलले गत १२ देखि १५ सम्मसम्म लिएको परीक्षामा एमबीबीएस र वीडीएसतर्फ गरी १ हजार २२० जना फेल भएका छन् ।
काउन्सिलका रजिष्ट्रार डा. कृष्णप्रसाद अधिकारीले एमबीबीएस र बीडीएसमा गरी २ हजार ३ सय ३११ ले लाइसेन्स परीक्षा दिएको जनाएका छन् । जसमा १ हजार ९१ जना, अर्थात ४७ प्रतिशत चिकित्सक मात्रै पास भएको जनाएका छन् ।
काउन्सिलको तथ्यांक अनुसार एमबीबीएस तर्फ ४७ दशमलव ११ र बीडीएस तर्फ ४७ दशमलव ६० प्रतिशत चिकित्सक पास भएका हुन । यसपटक एमबीबीएसमा कुल १ हजार ८ सय ३९ जनाले परीक्षाका लागि फारम भरेका थिए । त्यसमध्ये परीक्षामा ७ जना अनुपस्थित भएका थिए । नेपाल इन्जिनियरिङ अध्ययन संस्थान पुल्चोकमा भएको परीक्षा डा. अधिकारीले एमबीबीएसतर्फ कुल १ हजार ८ सय ३२ जनाले एबीबीएसतर्फको लाइसेन्स परीक्षा दिएकोमा ८ सय ६३ जना मात्रै पास भएको बताएका छन् ।
यस्तै, बीडीएसतर्फ कुल ४ सय ८२ जनाले फारम भरेकोमा ३ जना अनुपस्थित भएका थिए । त्यसपछि परीक्षा दिएका ४ सय ७९ जना भए पनि २ सय २८ जना मात्रै पास भएका छन् ।
त्यसैगरी, धेरै डाक्टर पटक–पटक फेल हुन थालेपछि काउन्सिलले एमबीबीएस उत्तीर्ण विद्यार्थीले चिकित्सा पेसा अपनाउन नचाहे लाइसेन्स परीक्षा दिन नपर्ने व्यवस्था ल्याउन लागेको छ ।
एमबीबीएस तथा र बीडीएस उत्तीर्ण भएका तर भविष्यमा चिकित्सा पेसा गर्न नचाहनेलाई लाइसेन्स नचाहिने व्यवस्था गर्न लागेको छ । मेडिकल काउन्सिलकको तथ्यांक अनुसार १० औँ, २०औँ पटकसम्म ‘लाइसेन्स’ परीक्षा दिएर पनि अनुत्तीर्ण भएका विद्यार्थी १ हजार १ सय भन्दा माथि छन् ।
लाइसेन्स परीक्षामा उत्तीर्ण हुन नसक्नेलाई बिरामी जाँच, परीक्षणजस्ता उपचार गर्नु नपर्ने, स्वास्थ्यसँग सम्बन्धित विषयमा स्नातकोत्तर अध्ययन गर्न दिने प्रक्रिया अगाडि बढाएको रजिस्ट्रार अधिकारीले बताए ।
‘यस्तो व्यवस्था नेपाल, भारत, पाकिस्तानबाहेक थुप्रै मुलुकमा छ । हामी पनि आउने वर्षदेखि लाइसेन्स परीक्षालाई अनिवार्य नगर्ने पक्षमा छौं’, उनले भने, ‘एमबीबीएस उत्तीर्णले चिकित्सकीय काम नगर्ने हो भने, उनीहरूको शैक्षिक प्रमाणपत्रलाई स्नातकसरह मान्यता दिएर स्नातकोत्तर अध्ययनका लागि व्यवस्था गर्न लागिएको हो ।’
हाल एमबीबीएस पास गरेका विद्यार्थीले लाइसेन्स परीक्षा पास नगरी अन्य कुनै संकायमा थप अध्ययन गर्न पाउँदैनन् । त्यसैगरी, लाइसेन्स पास नगरेका चिकित्सकले बिरामी जाँच्न पाउँदैनन् । हरेक वर्ष कम मात्रै चिकित्सक पास हुुने गरेपछि उनीहरुको क्षमता माथि प्रश्न उठ्ने गरेको छ ।
प्रतिक्रिया