विराटनगरमा आन्दोलन, बजार बन्द

मोरंगको विराटनगर महानगरपालिकाले बजार क्षेत्रको सडकमा जथाभावि पार्किङ गर्न रोक लगाएपछि व्यापारीले विरोधमा बजार बन्द गराएका छन् । नगरप्रमुुख नागेश कोइरालाको निर्णयको विरोध गर्दै व्यापारीले मुख्य बजार बन्द गराएका छन् ।

सोमबार पसल बन्द गराएर आन्दोलनमा उत्रिएको खुद्रा व्यापार संघ मोरङका अध्यक्ष सञ्जय मण्डलले बताएका छन् । महानगरपालिकाले विकल्प नदिई पार्किङ हटाएको भन्दै उनीहरुले विरोध गरेका हुन ।

महानगरपालिकाले बजार क्षेत्रमा रहेका खाली जग्गामा पार्किङ बनाउने अभियान सञ्चालन गरिररहेको छ । मुख्य बजार क्षेत्रमा विकल्प नदिई पार्किङ निषेध गरेपछि आन्दोलनमा उत्रिनु परेको उनले बताए ।

महानगरपालिकाका प्रमुख नागेश कोइरालालाई भेटेर विकल्प दिएर मात्रै पार्किङ हटाउन व्यापारीले माग गरेका थिए । कोइरालाले भने दुई महिनाको समय मागेका छन् ।

महानगरपालिकाले शनिमन्दिर–जलजलाचोक, शनिमन्दिरदेखि महावीर रोडसम्मको क्षेत्रलाई पनि पार्किङ निषेधित घोषणा गरेको थियो । बढ्दो सावरी चापसंगै मुुख्य शहरहरुमा पाकिंगको समस्या निकै हुने गरेको छ ।