कुर्घा पोखरा सम्पर्क समाजको साधारणसभा सम्पन्न

पर्वत जिल्लाको फलेवास नगरपालिका साविक कुर्घा गाविसमा स्थाइ घर भइ हाल विभिन्न पेसाव्यावसायको शिलशिलामा पोखरा बस्दैआएका कुर्घेलीहरुको संस्था कुर्घा पोखरा सम्पर्क समाजको पाँचौ साधारणसभा शनिबार सम्पन्न भएको छ ।

पोखरा-११ काहुडाडामा आयोजित कार्यक्रमलाइ सम्बोधन गर्नुहुदै नगरप्रमुख गङ्ङाधर तिवारीले विभिन्न पेसा व्यवसायको शिलशिलामा पोखरा बसेर पनि मतदाता नामावली गाउमै राख्ने मात्रै नभएर गाउको हरेक बिकासमा सकृय भएकोमा आभार व्यक्त गर्नुभयो । कुर्घाको जस्तोसुकै काममा नगरले सहयोग गर्ने भएकोले निस्चित कार्यक्रमको प्रस्ताव पत्र पठाउन आग्रह गर्नुभयो । नगरबासीकै सेवा गर्न नगरपालिकामा आफू रहेकोले जस्तोसुकै कामको लागि पनि आफू तयार रहेको बताउनुभयो ।

प्रबिधिको जमाना भएकोले व्यस्त समयमा हरेक कामको लागि नगरमै दुख पाउन नपर्ने इन्टरनेटको माध्यमबाट काम फत्ते हुने बाचा गर्नुभयो । नगरलाइ समृद्धिको बाटोमा डोर्याउन सधै नगरबासीको साथ र सहयोग आवश्यक रहेको बताउनुभयो ।
कार्यक्रमलाई सम्बोधन गर्दै नगर उपप्रमुख शोभाकुमारी क्षेत्रीले कुर्घाबाट पोखरा आएर बसेको भएपनि आफ्नो गाउँको बिकासमा सधै केन्द्रित हुने कुर्घा पोखरा सम्पर्क समाजको सामाजिक कामप्रति प्रशंसा गर्नुभयो । नगरपालिकाले कुर्घा लगायत गाउका किसानको लागि कृषिका आयमुलक र उत्पादनमुलक क्षेत्रमा लगानी गरेको भन्दै ती कार्यमा सहभागी हुन आग्रह गर्नुभयो ।

फलेवास १० कुर्घाका अध्यक्ष अमरबहादुर क्षेत्रीले समाजले गरेका कामको प्रशंसा गर्नुभयो । समाजका उपाध्यक्ष धनप्रसाद पौडेलको अध्यक्षतामा सम्पन्न कार्यक्रमको सञ्चालन संस्थाका सचीव सुर्यराज पौडेलले गर्नुभएको थियो । कार्यक्रममा उपाध्यक्ष पौडेलले संस्थाको संस्थागत प्रतिबेदन र कोषाध्यक्ष भोजराज पौडेलले गर्नुभएको थियो ।

२०७४ सालमा स्थापना भइ २०७५ जेठ ७ गते जिल्ला प्रशासन कार्यालयमा दर्ता भएको संस्थामा ४२ जना आजिवन सदस्य रहेका छन् । संस्थाले कुर्घा लगायत फलेवासबाट उपचार तथा अन्य कामले पोखरा पुग्दा हुने समस्या समाधानमा स्थापनाकालदेखी नै आर्थिक, भौतिक, नैतिक सहयोग गर्दै आइरहेको छ । कोषाध्यक्ष कंडेलका अनुसार संस्थामा हाल ३ लाख ६३ हजार ३४६ रुपैयाँ बचत छ ।