आजदेखि लाइसेन्स ट्रायलमा ७० को अंकभार लागू

बागमती प्रदेशभित्र आजदेखि सवारीचालक अनुमतिपत्र (लाइसेन्स)को ट्रायलमा ७० को अंकभार लागू हुँदै छ । अन्य प्रदेशमा लागू भइसकेको यो नियम बागमती प्रदेशका पाँचवटै यातायात कार्यालय र ट्रायल सेन्टरमा पनि लागू हुन लागेको हो । यो अंकभार लागू भएपछि ट्रायल दिनेमध्ये झन्डै ७० प्रतिशत उत्तीर्ण हुने अनुमान छ ।

यसअघि कडा नियम हुँदा ३५ प्रतिशतले मात्रै ट्रायल कटाउँथे । यातायात व्यवस्था विभागका अनुसार हाल ट्रायलका लागि लिखित फाराम भर्नेको संख्या झन्डै ३० हजार छ । लाइसेन्स लिन असहज हुने र समयमै पालो नआउने भएपछि कतिपयले विनालाइसेन्स सवारी हाँकिरहेका छन् । नयाँ नियम लागू भएपछि तत्कालका लागि यातायात कार्यालयमा लाइसेन्स लिन पुग्नेको चाप बढ्ने र बिस्तारै घट्ने अपेक्षा गरिएको छ ।

मंगलबारदेखि ७० को अंकभार लागू गर्न सोमबार यातायात कार्यालय कुमारी हलमा अभ्यास गरियो । यसअघि जनशक्ति नभएको बहानामा बागमतीमा यो नियम लागू भएको थिएन । तर, भौतिक पूर्वाधार तथा यातायात मन्त्रालयको दबाबपछि श्रम, रोजगार तथा यातायात मन्त्रालय बागमती प्रदेशले पनि लागू गर्न लागेको हो । यो नियम लागू गरेपछि जनशक्तिको अभाव नहुने यातायात व्यवस्था विभागका महानिर्देशक तुलसी गौतमले बताए ।

७० अंकभारको नियम लागू भएसँगै सुरुवाती समयमा सेवाग्राहीको चाप बढ्ने भएकाले यातायात कार्यालयले शनिबार पनि ट्रायल दिन पाउने नियम लागू गर्ने तयारी गरेका छन् । बागमती प्रदेश सरकारको निर्देशनपछि सबै कार्यालयले यो नियम लागू गर्नका लागि तयारी गरेको श्रम, रोजगार तथा यातायात मन्त्रालय बागमती प्रदेशका प्रवक्ता हरिहर पोखरेलले जानकारी दिए ।